![Quezon Lambanog Summit 2024 | August 14, 2024](https://quezon.gov.ph/wp-content/uploads/2024/08/08-14-2024-Quezon-Lambanog-Summit-2024-1-scaled.jpg)
Quezon Lambanog Summit 2024 | August 14, 2024
Kauna-unahang QUEZON LAMBANOG SUMMIT, malugod na dinaluhan ni Governor Doktora Helen Tan kasama si Senator Maria Imelda Josefa Remedios “Imee” R. Marcos bilang panauhing pandangal ngayong araw ng Miyerkules, Agosto 14 sa Quezon Convention Center, Lucena City.
May temang “Quezon Lambanog: Opportunities, Challenges, and Impact to Tourism” ang nasabing programa na pinangunahan ng Office of the Provincial Agriculturist at dinaluhan ng mga magniniyog, distillers, sellers, at resellers ng lambanog sa buong lalawigan.
Matatandaang nito lamang Marso 2024 ay hinirang ang Lambanog ng Quezon Province bilang ikalawang best spirit sa buong mundo ng kilalang online food and travel guide na TasteAtlas, kung kaya’t ang pangunahing layunin ng summit ay mas mapaigting at mapaunlad pa ang produksyon ng lambanog.
Sa mensaheng inihayag ni Senator Imee Marcos, kanyang sinigurado na may kasangga ang lalawigan ng Quezon sa senado para sa pagpapayabong ng kanilang industriya ng niyog. Bitbit din ng Senadora ang libreng Nutribun para sa mga kabataan.
Ayon naman kay Governor Tan, patuloy ang pagsisikap ng Pamahalaang Panlalawigan upang makapagbigay ng sustenableng hanapbuhay para sa bawat Quezonian na magniniyog, at kanyang ibinahagi ang paglalagay na ng selyo at FDA Approved ng bawat Lambanog na mula sa lalawigan.
Samantala, nagkaroon din ng panunumpa ng mga miyembro ng Quezon Lambanog Industry Development Council (QLIDC), paglulunsad ng Niyogyugan Foundation, at presentation ng Quezon Coconut Industry Road Map (2024-2026).
<hr>
<b><i class=”bi bi-c-circle”></i> Quezon PIO</b>