Pagkakaloob ng Packaging Materials, Food Processing Tools and Equipment at Coding Machines sa mga Assisted Organizations ng OPA | February 25, 2025

Pagkakaloob ng Packaging Materials, Food Processing Tools and Equipment at Coding Machines sa mga Assisted Organizations ng OPA, isinagawa

Matagumpay na naisagawa ang turn-over ceremony ng mga packaging materials at coding machine sa mga assisted organizations mula sa iba’t-ibang bayan sa lalawigan nitong Pebrero 20, 2025 sa Sitio Fori, Brgy. Talipan, Pagbilao, Quezon.

Pinangunahan ito ng Agricultural Support Services Division – Quezon Food and Herbal Processing Center at Quezon Product Display Center Staff sa ilalim ng Tanggapan ng Panlalawigang Agrikultor (OPA) kung saan ilan sa mga asosasyon na napagkalooban ay ang mga Young Farmers Associations sa Candelaria, Quezon, at Gumaca, Herbal Growers Association, Rural Improvement Club of Mauban, ReINa Fish Processors mula sa Real, Quezon, SICAP Quezon Cooperative mula sa Pagbilao, Quezon, Pitogo Banana Growers Association, Guinayangan Coffee Agri-Farmers Processors and Entrepreneurs Agriculture Cooperative, San Francisco Aurora Agriculture Cooperative at ang D’ Aroma Rural Improvement Club mula naman sa bayan ng Dolores, Quezon na gumagawa at nagpoproseso ng iba’t-ibang mga produkto.

Ang nasabing aktibidad ay bahagi ng patuloy na pagsuporta ng Pamahalaang Panlalawigan ng Quezon sa mga maliliit na negosyo at kooperatiba sa sektor ng agrikultura at pangisdaan. Sa pamamagitan ng pagbibigay ng mga kalidad na packaging materials at coding machine ay patuloy ang pagpapataas ng kalidad ng mga lokal na produkto, pagpapapabilis ng produksyon, pagpapalawak ng merkado, na higit na matutulungan maiangat ng kabuhayan ng bawat miyembro ng organisyon at makilala ang produktong Quezonian.

#agribasedproductdevelopment #OPAQuezon #opaquezonfitscenter

---

Quezon PIO / ProVET

𝐍𝐢𝐲𝐨𝐠𝐲𝐮𝐠𝐚𝐧 𝐅𝐞𝐬𝐭𝐢𝐯𝐚𝐥 𝟐𝟎𝟐𝟓 𝐧𝐚! | February 25, 2025

Humanda nang ipamalas ang ikinukubling galing sa pag-indak, Isiwalat na ang ritmong may pag-angkin sa Tagay at Umpukan, at ipagmalaki ang kulturang taglay ng bawat Quezonian!

Isasagawa sa darating na ika-18 hanggang 19 ng Marso ang pagsasanay para sa 𝐒𝐚𝐲𝐚𝐰 𝐧𝐠 𝐍𝐢𝐲𝐨𝐠 𝐃𝐚𝐧𝐜𝐞 𝐖𝐨𝐫𝐤𝐬𝐡𝐨𝐩 sa St. Jude Multipurpose Cooperative, Lucena City, ganap na ika-8 nang umaga.

Kasunod nito, sa darating na ika-21 hanggang 22 ng Marso, taong kasalukuyan, sa pamamagitan ng Quezon Provincial Tourism Office, ay gaganapin ang 𝐓𝐚𝐠𝐚𝐲𝐚𝐧 𝐃𝐚𝐧𝐜𝐞 𝐑𝐢𝐭𝐮𝐚𝐥 𝐖𝐨𝐫𝐤𝐬𝐡𝐨𝐩 sa St. Jude Multipurpose Cooperative, Lucena City, ganap na ika-8 nang umaga.

Ang nasabing mga aktibidades ay bilang paghahanda para sa mas makulay, mas masaya, at mas makasaysayang niyogyugan 2025!

Kaya naman huwag n’yo nang patagalin at magtungo sa Tourism Office ng bawat bayan na inyong kinabibilangan upang alamin ang mga kinakailangang dokumento para maging kwalipikadong kalahok sa patimpalak na ito.

Paalala: Bawat grupong dadalo sa mga Workshop na ito ay kinakailangan lamang magpadala ng DALAWANG (2) kinatawan para sa Tagayan Ritual at PITO (7) naman para sa Sayaw ng Niyog Dance Workshop.

Para maging update sa mga susunod pang kagananapan, mangyari lamang na ilike o ifollow ang ating facebook page.

: ACNP Photography

#Niyogyuganfestival #TAraNasaQuezon #SerbisyongTunayAtNatural

---

Quezon Tourism

Kalinga sa Mamamayan, Libreng Gamutan (Medical Mission) | February 25, 2025

Kalinga sa Mamamayan, Libreng Gamutan (Medical Mission)

February 25, 2025 | Brgy.Apad Lutao Calauag Quezon

Link 1: https://www.facebook.com/share/v/1AJ8nc2Pnc/

Link 2: https://www.facebook.com/share/v/15gxr4sy1c/

---

Quezon PIO

SA MALINIS NA KAPALIGIRAN DENGUE AY MAIIWASAN | February 24, 2025

Ang dengue ay isang seryosong sakit na dulot ng kagat ng lamok na Aedes Aegypti. Kapag hindi naagapan, ay nakamamatay. Kung kaya’t agad na magpakonsulta sa unang sintomas (LAGNAT NG 2 ARAW) ng Dengue. Ang sumusunod ay mga karagdagang sintomas na maaring maranasan:

• Pananakit ng Katawan

• Pagsusuka

• Pagdugo ng Gilagid

• Dugo sa dumi ng tao

• Panghihina

• Pagdugo ng Ilong

Maiiwasan naman ito sa tamang paghahanda, at isa sa mga hakbang upang maiwasan ang pagkalat ng dengue ay pag: TAOB, TAKTAK, TUYO, AT TAKIP ng mga lagayan na posibleng panirahan ng mga lamok.

Alinsunod nito ay ang pagamit din ng insecticide, insect repellent, kulambo at pagsusuot ng long-sleeves at pantalon upang maiwasan na makagat ng Aedes Aegypti.

Tandaan na sa malinis na kapaligiran, dengue ay maiiwasan.

Source: Department of Health

---

Quezon PIO / IPHO

Bagong PhilHealth PCEO Dr. Edwin Mercado, Bumista sa Pamahalaang Panlalawigan para sa Pagpapaigting ng Serbisyong Pangkalusugan | February 24, 2025

Bumisita sa Pamahalaang Panlalawigan ang bagong President at Chief Executive Officer ng Philippine Health Insurance Corporation (PhilHealth)

na si Dr. Edwin M. Mercado, ngayong araw ng Lunes, Pebrero 24.

Si Dr. Mercado ang itinalaga ni President Ferdinand “Bongbong” R. Marcos Jr. bilang bagong PCEO ng PhilHealth at nanumpa sa Malacañang Palace, nitong Pebrero 4.

Buong galak na tinanggap ni Governor Doktora Helen Tan ang naging pagbisita at positibong nakipagpulong para sa pagpapaigting ng programa na katuwang ang naturang health insurance corporation.

Samantala, mananatiling bukas ang Pamahalaang Panlalawigan sa pakikipag-ugnayan upang higit na makapagbigay ng maayos na serbisyong pangkalusugan para sa bawat mamamayan.

---

Quezon PIO

Gabay sa Pagkonsulta sa Doktor Gamit ang Teleconsultation

Good day Quezonians! Sa pag-usbong ng mga makabagong paraan ng pagkonsultang medical, maari ka nang makakuha ng libreng konsulta sa doktor, dentista o nutritionist dietician ng mga kondisyong hindi nangangailangan ng agarang gamutan. Halina at gamitin ang libreng konsultasyon sa pamamagitan ng Telemedicine service ng Provincial Health Office. Gamit lamang ang iyong cellphone o laptop at internet connection ay maari ka nang makapagpakonsulta kahit saan mang lugar ka naroroon. Sundin lamang ang mga hakbang na nasa larawan upang makapagtakda ng teleconsultation sa aming tanggapan.

#HealthyQuezon

#LibrengserbisyongpangkalusugansaQuezon

---

IPHO

Free Spay and Neuter – OVP | February 24, 2025

Nagtungo ang mga technical personnel ng Office of the Provincial Veterinarian (OPV) mula sa Animal Health and Welfare Division (AHWD) sa pangunguna ni Dr. Philip Maristela at Dr. Camille Calaycay sa Real, Quezon, nitong Pebrero 20-21, 2025 para sa isang Veterinary Medical Mission.

Nagkaloob ang tanggapan ng mga libreng serbisyo para sa mga furparents ng nasabing bayan gaya ng: Spay, castration, rabies vaccination, deworming, consultation, and treatment.

May kabuuang 194 na mga aso at pusa ang nabigyang serbisyo na pag-aari ng 116 na kalalawigan natin mula sa Real, Quezon.

Ang nasabing aktibidad ay bilang pag-obserba ng Spay and Neuter Awareness Month ngayon Pebrero at Rabies Awareness Month naman sa buwan ng Marso. Ito ay naglalayong ipaalam sa mga Quezonians ang kahalagahan ng neutering sa kalusugan ng mga hayop at pagkontrol sa mabilis na pagdami ng mga aso at pusa na mayroon din epekto sa pagsugpo ng Rabies sa bansa. Sa pagdami ng mga asong/pusang gala ay mas marami ang posibleng mahawa at makapanghawa ng Rabies sa ibang hayop at sa tao. Ang Rabies ay isang sakit na sanhi ng virus na maaaring maihawa sa pamamagitan ng kagat.

---

Quezon PIO / ProVET

Quezon Native Pig Dispersal – OVP | February 24, 2025

Sa ilalim ng Quezon Native Pig Development Project, ay nagkaloob ng mga breeder animals ang Office of the Provincial Veterinarian (OPV) para sa Livestock Demo Area ng Office of the Municipal Agriculturist (OMA) ng Calauag, Quezon.

Ito ay upang mapadami ang mga nasabing hayop na maaari namang ipamahagi para sa mga farmers ng naturang bayan. Alinsunod ito sa mga layunin ng proyekto na conservation, development, at utilization ng mga katutubong baboy ng Quezon.

---

Quezon PIO

STAN Basketball Academy Free Basketball Clinic | February 22, 2025

Upang masaksihan ang tunay na husay at galing ng mga kabataang Quezonian sa larangan ng basketball, matagumpay na ginanap ngayong araw ng Pebrero 22 ang Free Basketball Clinic sa Maryhill College, Lucena City.

Sa pagtutulungan ng STAN Basketball Academy sa pangunguna ni Coach Mark Panganiban at Provincial Sports Office sa pangunguna naman ni Coach Aris Mercene, nakapaglaro ang 450 players lalaki at babae na may edad na 10-18 taong gulang na nagmula sa ikalawang distrito.

Layunin ng aktibidad na ito na paunlarin at mahasa ang kakayahan ng mga kabataan sa paglalaro ng isport na basketball. Sa tulong ng mga coaches, nagsilbing daan ito upang malinang ang kanilang socialization skills, teamwork at sportsmanship.

Samantala, ipagpapatuloy ang nasabing palaro hanggang bukas Pebrero 23. Asahan naman ang patuloy na susuporta ang Pamahalaang Panlalawigan sa pangunguna ni Governor Doktora Helen Tan sa mga aktibidad na makapagpapaunlad ng kagalingan at talento ng kabataang Quezonian.

---

Quezon PIO

Nagsagawa ng 1st Quarterly Meeting ang Provincial Council for the Protection of Children (PCPC) | February 21, 2025

Upang higit na mabantayan ang karapatan ng mga bata at matiyak ang kanilang kapakanan, nagsagawa ng 1st Quarterly Meeting ang Provincial Council for the Protection of Children (PCPC) ngayong araw ng Biyernes, Pebrero 21, sa Kalilayan Hall, Lucena City.

Layunin ng pagpupulong na patuloy na magplano at magpatupad ng mga proyekto upang mas mapalakas at maprotektahan ang kabataan laban sa pang-aabuso, kalupitan, diskriminasyon, at iba pang anyo ng paglabag sa kanilang mga karapatan.

Ito ay isinasakatuparan sa pamamagitan ng pakikipag-ugnayan sa mga LGUs sa bawat munisipalidad ng Quezon at mga lokal na stakeholders tulad ng mga Non-Government Organizations (NGOs), Youth Organizations, at iba pang child-focused institutions, upang matiyak na naisusulong ang mga programang nakaangkla sa mga batas na nagpoprotekta sa mga bata.

Asahan ang patuloy na pagsusumikap ng Pamahalaang Panlalawigan sa pangunguna ni Governor Doktora Helen Tan upang matiyak ang isang ligtas at maayos na kapaligiran para sa lahat ng batang Quezonian.

---

Quezon PIO