Stage 2 Certification Audit – Quality Management System (QMS) ISO 90012015 | March 26, 2025

TINGNAN: Nagbunga ang mahabang preparasyon at matiyagang paghahanda ng bawat tanggapan, nakapasa ang Pamahalaang Panlalawigan sa Stage 2 Quality Management System (QMS) Certification Audit na isinagawa ng Certification Partner Global (CPG)FZ LLC nitong Marso 25 hanggang 26.
Ang Stage 2 Certification Audit ay nakatuon sa mas komprehensibong pagsusuri sa sistema, dokumentasyon, at proseso na nagaganap sa bawat tanggapan upang matiyak na ang bawat isa ay tumutugon sa kinakailangang pamantayan ng sertipikasyon. Mahalaga rin sa yugtong ito ang mga ebidensya at tala na magpapatunay na nasusunod at nauunawaan ng bawat isa ang mga proseso at pamantayan sa pamamahala at serbisyo.
Sa isinagawang audit, tagumpay na naipasa ng 22 tanggapan at 14 na yunit ang pagsusuri at naipakita sa mga auditors ang mga dokumento na magpapatunay ng pagsunod sa mga prosesong kinakailangan. Sa nasabing certification audit, walang naitalang MAJOR at MINOR Non-Conformity ang CPG at ito ay nangangahulugang nasusunod ng Pamahalaaang Panlalawigan ang mga kinakailangang pamantayan sa sertipikasyon.
Ang positibong resulta ng pagkakapasa sa ISO 9001:2015 ay sumasalamin sa maayos at epektibong pamamahala at serbisyo ng Pamahalaaang Panlalawigan sa pangunguna ni Governor Doktora Helen Tan. Ito rin ay mahalagang hakbang upang maipakita na kaya nating makipagsabayan sa international standards at makapagbigay ng serbisyong may kalidad at kredibilidad.
Sa tagumpay na ito, lubos na pinasalamatan ni Governor Tan ang mga punong tanggapan at lahat ng kawani ng Pamahalaaang Panlalawigan na nakiisa at nakipagtulungan upang makamit ang ISO Certification. Gayundin, malugod niyang pinasalamatan ang mga auditors na pinamumunuan ni Auditor Team Leader Gilda Ramos na masigasig na nagsuri at nagrekomenda ng mga hakbang upang lalo pang mapabuti ang sistema ng pamamahala sa lalawigan.

#ISOCertified

Quezon PIO

Turn-Over of Dental Van at Ceremonial Distribution of School Chairs sa mga pampublikong paaralan sa Lalawigan ng Quezon | March 25, 2025

Dahil isa sa pangunahing prayoridad ni Governor Doktora Helen Tan ang kalusugan at kapakanan ng mga mag-aaral, maayos na naisagawa ngayong araw ng Martes, Marso 25 ang Turn-Over of Dental Van at Ceremonial Distribution of School Chairs sa mga pampublikong paaralan sa Lalawigan ng Quezon.
Sa unang bahagi ng seremonya, pinangunahan ni Governor Tan ang blessing ng ikalawang Dental Van na ipagkakaloob sa Department of Education Quezon Division. Ito ay pinondohan gamit ang Special Education Fund at itinuturing na isa sa mga pangunahing proyekto ng Pamahalaaang Panlalawigan na inaasahang iikot at magbibigay ng dental service sa iba’t ibang pampublikong paaralan.
At upang mas maayos at komportableng makapag-aral ang mga estudyante, namahagi rin ng dagdag na arm chairs at monoblock chairs na tiyak na mapakikinabangan ng mga paaralan mula sa una hanggang ikaapat na distrito ng Quezon.
Lubos naman na pasasalamat ang ipinaabot ng buong DepEd Quezon Division sa Pamahalaang Lalawigan at kay Governor Tan sapagkat magiging malaking tulong ang mga upuang ito upang magkaroon ng maginhawang kapaligiran sa loob ng silid-aralan.
Samantala, siniguro naman ng Gobernadora na hindi tumitigil ang Kapitolyo at ginagawa ang lahat ng pamamaraan upang matugunan ang mga kakulangan at pangangailangan ng mga paaralan sa lalawigan.

Quezon PIO

Serbisyo para kay Juana: Cervical Screening Program | March 25, 2025

Sa pakikibahagi parin ng 2025 Women’s Month Celebration bilang pagkilala sa lakas, tibay, at mga kontribusyon ng mga kababaihan sa lahat ng sektor ginanap ang Serbisyo para kay Juana: Cervical Screening Program ngayong araw ng Martes, Marso 25 sa Ibabang Talim, Lucena City.
Sa inisyatibo ni Governor Doktora Helen Tan pinangunahan ito ng Provincial Gender and Development Office (PGAD) katuwang ang Provincial Health Office (PHO) kasama ang ilang kawani ng Pamahalaang Panlalawigan ng Quezon kung saan tinatayang nasa Labing Lima ang napagkalooban ng naturang serbisyo.
Ang Cervical Screening Program ay isang mahalagang programa na naglalayong protektahan ang kalusugan ng kababaihan sa pamamagitan ng maagang pagtuklas ng cervical cancer.
Ang cervical cancer ay isang uri ng kanser na nakaaapekto sa kwelyo ng matres (cervix) ng isang babae, isa ito sa mga pangunahing sanhi ng pagkamatay ng kababaihan sa Pilipinas, ngunit maiwasan ito sa pamamagitan ng maagang pagsusuri.

Quezon PIO

Site Inspection College of Medicine: SLSU Lucena Branch | March 25, 2025

Lucena City, Quezon

Link 1: https://www.facebook.com/share/r/18xfAVQ1D6/
Link 2: https://www.facebook.com/share/r/1EkT978qvb/

Quezon PIO

Ceremonial Distribution of School Chairs and Turn-Over of Dental Van | March 25, 2025

Quezon Convention Center, Lucena City

Link 1: https://www.facebook.com/share/r/1A8YGhEztf/
Link 2: https://www.facebook.com/share/r/1FUcc1TkHt/

Quezon PIO

1st Quarterly Meeting of Quezon Provincial Alliance of Persons with Disability Affairs | March 25, 2025

Ipinakilala ni Dr. Milcah I. Valente, ang iba’t ibang programa at serbisyong iniaalok ng Office of the Provincial Veterinarian sa ginanap na 1st Quarterly Meeting ng Quezon Provincial Alliance of Persons with Disability Affairs Officers (QPAP) nitong Marso 20, sa St. Jude Coop Hotel and Event Center, Tayabas City.
Sa kanyang presentasyon, binigyang-diin ni Dr. Valente ang mga programang pangbeterinaryo, lalo na ang mga maaaring pakinabangan ng mga taong nabibilang sa sector ng PWD. Ipinahayag din niya ang kahalagahan ng madaling pag-access ng mga ito, oportunidad sa kabuhayan, at suporta mula sa pamahalaan. Bukod dito, nagbukas din ito ng posibilidad ng pakikipagtulungan ng OPV sa mga organisasyon ng PWDs upang mapalawak ang suporta sa kanilang kabuhayan, partikular sa larangan ng paghahayupan.
Nagbigay-daan ang pagpupulong sa mas malalim na talakayan ng mga opisyal at focal persons hinggil sa pagpapabuti ng mga serbisyo para sa PWDs sa lalawigan.
Regular na isinasagawa ng QPAP ang ganitong pagpupulong upang patuloy na mapaunlad ang mga programa, patakaran, at inisyatibang naglalayong mapabuti ang kapakanan at pag-unlad ng mga taong may kapansanan sa buong lalawigan.

#SerbisyongTunayAtNatural
#HEALINGQuezon
#provetquezon
#ProvincialGovernmentofQuezon
#VeterinaryServices

Quezon PIO / ProVet

Inauguration of 30-Sow Level Swine Multiplier Farm | March 25, 2025

Pinasinayaan nitong Marso 21 ang isang 30-Sow Level Swine Multiplier Farm sa Dolores, Quezon, isang proyektong mula sa Department of Agriculture sa pamamagitan ng Agricultural Training Institute (ATI) – International Training Center on Pig Husbandry (ITCPH), mula sa National Livestock Program (NLP). Ang proyektong ito ay ipinagkaloob sa Pinagdanlayan Multi-Purpose Cooperative.
Ito ay dinaluhan ni Provincial Veterinarian Dr. Flomella A. Caguicla, LGU Dolores Mayor Orlan A. Calayag, Municipal Agriculturist Eldrin Rubico, at Brgy. Chairman ng Manggahan, Kap. Renan Panganiban, at mga opisyales at personnel ng PMPC, sa pamumuno ni Chairman Apolonio De Rosales at Manager Liza Ailen Merano.
Ang nasabing proyekto ay malaking tulong para sa mga Swine farmers ng Dolores dahil magkakaroon na sila ng malapit na pagkukuhanan ng magagandang lahi ng baboy.
Lubos na ipinagpapasalamat ng mga miyembro ng PMPC, LGU Dolores at Provincial Government of Quezon, ang Swine Multiplier Farm sa ATI-ITCPH sa pamumuno ni Dr. Ruth Miclat Sonaco.

#SerbisyongTunayAtNatural
#HEALINGQuezon
#provetquezon
#ProvincialGovernmentofQuezon
#VeterinaryServices

Quezon PIO / ProVet

Gov. Doktora Helen Tan visited Quezon Provincial Hospital Network – Quezon Memorial Center (QPHN-QMC) | March 25, 2025

Sa walang patid na pagsasaayos ng sistema at kalagayang ng kalusugan ng mamamayan, binisita ni Governor Doktora Helen Tan, nitong araw ng Lunes, Marso 24 ang Quezon Provincial Hospital Network – Quezon Memorial Center (QPHN-QMC).
Layunin ng pagbisita na masiguro na nabibigyan ng tamang serbisyo ang mga pasyente sa QPHN-QMC sa kahit anong oras.
Isa rin sa nabigyang pansin ang QMC PAY Annex ICU COMPLEX na planong i-renovate katuwang ang Provincial Engineering Office (PEO) upang magamit at maging bagong pasilidad sa nasabing ospital.
Samantala, patuloy na susubaybayan at susuportahan ng Pamahalaang Panlalawigan ang QPHN-QMC para sa kagalingan ng mga Quezonian.

Quezon PIO

Boy Scouts of the Philippines Quezon Council Annual Council Meeting | March 24, 2025

Tagumpay na ginanap ngayong araw ng Lunes, Marso 24 ang Annual Council Meeting ng Boy Scouts of the Philippines Quezon Council sa Quezon Convention Center, Lucena City.
Sa unang bahagi ng programa, isinagawa ang panunumpa sa tungkulin ni Governor Doktora Helen Tan bilang Council Chairperson sa Scouting Year 2025, sinundan ito ng panunumpa ng mga bagong talagang Officers at miyembro ng Local Council Executive Board (LCEB), kabilang na ang 4 Elected Regular Members, Council Officers, Coopted Members/Sectoral Representatives, Council Standing Committees, at Council Strategic Planning Team/Quezon Internet Team (QUINTET).
Naglahad din ng report ang naturang konseho patungkol sa Council Performance for Scouting Year 2024 kung saan naipakita ang positibong pagtaas ng bilang ng mga scouts. Ito ay indikasyon na maayos na naisasakatuparan ang mga programa at proyekto na nakaangkla sa paghubog ng isang kabataang produktibo, matulungin, at may malasakit sa lipunan.
Nabigyang pagkilala rin sa programa ang mga paaralan sa Quezon na nagkamit ng Membership Achiever Awards, gayundin ang 26 finalist na Eagle Scouts at ang 10 Outstanding Boy Scouts of Quezon Council, Boy Scouts of the Philippines. Kinilala rin ang bayan ng Tagkawayan para sa kanilang bukas-palad na pagtanggap sa Hosting of Training and Activities of Boy Scouts of the Philippines at bayan ng Guinayangan para sa Continuous Municipal Financial Support and Assistance sa Boy Scouts of the Philippines.
Samantala, sa naging mensahe ni Governor Doktora Helen Tan, kanyang binalikan ang mga hamon sa scouting sa nakalipas na mga taon at pinasalamatan ang lahat ng nagtulong-tulong upang makaahon at magpatuloy ang boy scouts sa Quezon. Umaasa rin ang Gobernadora na mas lalo pang pagbubutihin ng konseho ang kanilang nasimulan upang lalo pang maipalaganap ang serbisyong naibibigay nito sa komunidad.

Quezon PIO

Ika-140 Pangkaraniwang Pulong ng Sangguniang Panlalawigan ng Quezon | March 24, 2025

Sa patuloy na pagpapatibay at pagpapalawak ng mga makabuluhang inisyatibong nagsusulong sa pagseserbisyong tapat at may malasakit sa mamamayang Quezonian, pormal na ginanap ang ika-140 Pangkaraniwang Pulong ng Sangguniang Panlalawigan ngayong araw ng Lunes, Marso 24.
Sa pangunguna ni Vice Governor at Presiding Officer Third Alcala kasama ang mga Board Member na kinatawan ng bawat distrito sa lalawigan ay naaprubahan ang mga Ordinansa, Resolusyon, Atas tagapag paganap at iba pang liham, alinsunod sa higit pang pagpapaunlad at pagpapatatag ng lalawigan ng Quezon.
Kaugnay nito, idiniklarang wasto ang Kautusang Bayan na isinulong ni 1st District Board Member at Committee on Agriculture, Coconut Industry and Fisheries Claro M. Talaga, Jr. sa Munisipalidad ng Polillo Quezon na may titulong: “Isang Kautusang bayang nagtatakda ng mga alituntunin sa pangingisda at/o pangisdaan sa bayan ng Polillo, lalawigan ng Quezon at para sa iba pang mga layunin, sa pamamagitan ng pagtatanggal sa seksyon 21.3 nito”, upang mabigyan ng mas maraming oportunidad ang mga mangingisda na makapaghanap-buhay ng legal at maging epektibo ang mga regulasyon.
Aprobado rin ang liham mula sa Punong Lalawigan na humihiling ng pagpasa ng isang resolusyon na nagbibigay pahintulot kay Governor Doktora Helen Tan na lumagda sa isang Memorandum of Agreement (MOA) sa ngalan ng Pamahalaang Panlalawigan ng Quezon kasama ang mga kinikilalang paaralan/kolehiyo/unibersidad para sa pagsasagawa ng praktikal na pagsasanay sa Clinical Clerkship at Medical Internship, ito ay isang mahalagang hakbang na makapagbibigay ng mas magandang kinabukasan para sa mga mag-aaral ng medisina at pagpapalakas ng sistemang pangkalusugan sa lalawigan ng Quezon.
Samantala, pinarangalan bilang OUTSTANDING LEGISLATIVE PERFORMANCE ang Sangguniang Panlalawigan ng Quezon para sa kanilang natatanging pagganap sa Lehislatura na nagpapatibay sa mga mekanismo ng lokal na pamamahala, na siyang nagdala sa kanila upang makamit ang pinakamataas na pagkilala bilang Provincial Awardee ng Seal of Good Local Governance 2024 (SGLG) na iginawad ng Department of the Interior and Local Government (DILG) sa idinaos na PBMLP 33rd National Convention noong ika-18 ng Marso sa Century Park Hotel, Manila.

Quezon PIO