NEWS AND UPDATE

Provincial School Board Meeting | February 26, 2024

Nitong Lunes, Pebrero 26 nagkaroon ng Provincial School Board Meeting sa pangunguna ni Governor Doktora Helen Tan kasama ang DepEd Quezon sa pangunguna ni Quezon Schools Division Superintendent Rommel Bautista.

Tinalakay sa nasabing pagpupulong ang ginagawang paghahanda para sa nalalapit na Palarong Quezon sa darating na March 7-10, 2024 na gaganapin pa rin sa Bayan ng Atimonan. Gayundin ang mga kinakailangang impormasyon para sa susunod na palarong pang-rehiyonal o Regional Athletic Association Meet (RAAM) na gaganapin naman sa Lalawigan ng Laguna.

Lubos ang pagsuporta ng Pamahalaang Panlalawigan sa mga atletang Quezonian kung kaya’t siniguro ang maayos na daloy ng mga programa upang maihatid ang organisado at ligtas na palaro para sa bawat manlalaro ng Lalawigan.

Source: Quezon PIO

Courtesy Call of Save the Children Philippines | February 26, 2024

Nakipagpulong kay Governor Doktora Helen Tan ang pamunuan ng Save The Children Philippines nitong nakaraang araw ng Lunes, Pebrero 26 upang ibahagi ang proyektong mapakikinabangan ng mga mamamayan ng Quezon.

Ang nasabing proyekto ay tinatawag na STRIDE na naglalayong mapalakas ang surveillance at response system pagdating sa mga community-based infectious disease upang maiwasan ang paglaganap epidemya.

Target namang maisakatuparan ang proyekto sa mga munisipalidad na kabilang sa Inter-Local Health Zone 2 o ang REINAPan Area (Reina, Infanta, General Nakar, at Panukulan).

Source: Quezon PIO

Ika-85 Pangkaraniwang Pulong ng Sangguniang Panlalawigan | February 26, 2024

Sa patuloy na pagsusumikap sa pagdinig ng mga usaping pang lehislatura at pagpapatibay ng mga ordinansang bayan, resolusyon, at mga atas tagapagpaganap, ginanap ngayong araw, Pebrero 26 ang ika-85 Pangkaraniwang Pulong ng Sangguniang Panlalawigan ng Quezon.

Aprubado sa sesyon ang ordinansang nagpapatibay sa Kultura, Sining at Turismo ng Quezon o Tourism Code of 2024 para sa pagpapaunlad, pagsulong at regulasyon ng kultura, sining at mga bagay na may kaugnayan sa turismo.

Kabilang din sa naauprubahan ang liham mula kay Governor Doktora Helen Tan na napapahintulot na pumirma sa kasulatan sa pagitan ng Pamahalaang Panlalawigan at Grepcor Diamonde Inc. para sa donasyon ng ng dalawang hospital bed at 1 OB-Gyne bed na tiyak na makakatulong sa mga pasyente ng lalawigan.

Samantala, ginawaran naman ng resolusyong pagkilala ang Lutucan National High School- Supreme Student Government Organization (LNHS- SSGO) sa kanilang pagkamit ng kauna-unahang tagumpay para sa lalawigan bilang Outstanding Youth Organization mula sa National Youth Commission.

Source: Quezon PIO

SP Building Visitation | February 26, 2024

Personal na binisita ni Governor Doktora Helen Tan ang kasalukuyang lagay ng isinasaayos na gusali ng Sangguniang Panlalawigan ng Quezon ngayong araw, Pebrero 26.

Ito’y upang siguraduhin na ang pasalidad ay maayos at magbibigay komportableng lugar na pagtatrabahuhan ng mga kawani na patuloy ang pagbibigay ng panglehislaturang serbisyo sa lalawigan.

Source: Quezon PIO

Quezon Women’s Volleyball Team Tryouts | February 24, 2024

Isinagawa nitong Sabado, Pebrero 24 ang huling Volleyball tryout para mga kabataang babaeng ipinanganak mula taong 2006, kung saan mga mula sa ika-apat na distrito ang sumabak at nagpakitang gilas sa larangan ng volleyball.
Sa kasalukuyan, buo na ang mga koponan na lalaro sa one day league mula sa REINA-POGI Area, District 1, 2, 3, at 4 na maghaharap-harap upang ipamalas ang husay at diskarte sa loob ng court sa layuning mapili at mapabilang sa binubuong Quezon Women’s Volleyball Team.

Puspusan na rin ang paghahanda ng Quezon Provincial Sports Office sa pangunguna ni Coach Aris Mercene para sa nalalapit na one day league.

Source: Quezon PIO

Orange Tourism Festival – Day 3

Matagumpay na naidaos ang huling araw ng mga aktibidad para sa pagdiriwang ng Orange Tourism Festival nitong Biyernes, Pebrero 23 sa Pamahalaang Panlalawigan ng Quezon bilang pakikiisa sa National Arts Month sa pangunguna ng Tourism Quezon Province na pinamumunuan ni Provincial Tourism Officer Mr. Nesler Almagro. Nagkaroon ng presentasyon at pagtatanghal ang bawat nakilahok mula sa iba’t-ibang larangan ng sining patungkol sa kanilang nabuo at natutunan sa loob ng tatlong araw na talakayan at workshop sa tulong ng mga ibinahaging kaalaman ng mga eksperto. Ang naturang selebrasyon ay hudyat ng muling pagbuhay ng sining sa lalawigan kung kaya’t asahan pa ang mga susunod na kaganapan at programa na magbibigay ng higit pang pagpapahalaga at espasyo para sa malikhaing puso at kaisipan ng mga Quezonian.

Source: Quezon PIO

Basic Life Support (BLS) Training With Ambulance Operations | February 23, 2024

“We always aim for the best” Ito ang sinabi ni PGDH-PDRRMO, Dr. Melchor P. Avenilla Jr. sa unang araw ng pagsasanay ukol sa Basic Life Support (BLS) at Ambulance Operation ng Quezon Ambulance Drivers ngayong araw ng Biyernes, Pebrero 23 sa Queen Margarette Hotel, Lucena City.

Nagkaroon ng pagtuturo ang PDRRMO patungkol sa mga pamamaraan sa pagliligtas ng buhay, iba’t-ibang klase ng life support, at tamang paghahawak at pag-aasikaso ng mga pasyente.

Binigyang-diin naman ng nasabing tanggapan na ang Basic Life Support ay mandatory para sa mga health workers (medical at allied medical professionals), at kabilang sa mga ito ang mga ambulance driver.

Source: Quezon PIO

Heads Up Job Seekers! | February 23, 2024

Start your HEALTHCARE JOURNEY WITH US! Because Quezon Provincial Hospital Network – Quezon Medical Center (QPHN-QMC) is currently looking for REGISTERED NURSES & RADIOLOGIC TECHNOLOGIST!

Qualifications:
● With VALID PRC License;
● With excellent communication and customer service skills

For those who are interested to apply, kindly send your Resume and Application Letter thru our email
qmchroffice@gmail.com.
Heads Up Job Seekers!

For those who are interested to apply, kindly send your Resume and Application Letter thru our email
qmchroffice@gmail.com.

We are also accepting WALK-IN APPLICANTS, visit our office at Quezon Ave Ext. Brgy. XI Lucena City, 3rd floor of QMC Pay Annex building (Human Resource Department)

Be part of our growing team!

Orange Tourism Festival – Day 2: Workshop Breakout Sessions | February 22, 2024

Naging produktibo ang pagpapatuloy ng pagdiriwang ng Orange Tourism Festival sa ikalawa nitong araw sa pangunguna ng Provincial Tourism Office, Pebrero 22.

Bilang pagsuporta sa kultura at sining na mahalagang bahagi ng kasaysayan sa ating lalawigan, isinagawa ang iba’t ibang workshop na dinaluhan ng mahigit 200 indibidwal na nais mapalawak pa ang kanilang kakayanan at kaalaman sa iba’t ibang larangan ng sining.

Ibinahagi ng mga eksperto ang kanilang kagalingan sa iba’t ibang larangan ng sining tulad ng:

Theater – Dulaang Kalilayan

Literature – Tulay: Tulaang Kalilayan

Visual Arts – Kable Art

Dance – Sayaw Galaw, Quezonian

Film – Pelikulalilayan

Music – “AM + PM: Awiting Malikhain + Pagkantang Masinig”

Architecture – Espasyo: Design Conceptualization and the Creative Process

Gastronomy – Chocolate Showpiece, Cocolinary, at Lambanog Mixology.

Abangan bukas ang pagpapatuloy ng nasabing Festival para sa presentasyon at pagbibigay parangal sa mga kalahok.

Source: Quezon PIO

2024 Seal of Good Local Governance (SGLG) Meeting | February 21, 2024

Ngayong araw ng Miyerkules, Pebrero 21 ginanap ang pagpupulong para sa 2024 Seal of Local Governance kasama iba’t-ibang local government unit sa lalawigan ng Quezon.

Sa pangunguna ni Provincial Administrator Manuel Butardo, iniulat sa pulong ang mga datos at kalagayan ng ilang LGUs pagdating sa maayos na pagseserbisyo sa iba’t-ibang ng sektor.

Magsisilbing gabay naman ito upang malaman kung ano ang mga kinakailangan gawin upang masiguro na makukuha ng Pamahalaang Panlalawigan gayundin ng mga bayan sa Quezon ang 2024 SGLG Award.

Source: Quezon PIO