Lingap sa Mamamayan Libreng Gamutan – Alabat, Quezon | April 06, 2024
Napuno ng emosyon ang mensaheng inihayag ni Governor Doktora Helen Tan sa ikalawang araw ng Medical Mission sa AlQueRez Islands na ginanap nitong araw ng Sabado, Abril 6 sa Perez, Quezon.
Sa hangarin na mailapit at maisaayos ang kalusugan sa buong lalawigan, binigyang-diin ng gobernadora na handa ang Pamahalaang Panlalawigan na maging sandalaan ng bawat Quezonian sa oras ng kanilang matinding pangangailangan, at isa sa proyektong kanyang ibinahaging pinagtutuunan ay ang pag-sasaayos ng Quezon Provincial Hospital Network (QPHN)-Alabat.
Samantala, umabot sa 2,710 na mamamayan mula sa nasabing isla ang nabigyang pagkakataon upang maging benepisyaryo ng mga libreng serbisyong gamutan, kabilang na ang medical check-up, tuli, physical therapy, breast screening exam, cervical cancer screening, eye check-up, ENT, ob-gyne, ultrasound, X-ray, minor surgery, psychiatry, orthopedic, PCV 23 Vaccination, at iba’t-ibang Laboratory Services.
Hatid naman ng Provincial Social Welfare and Development Office (PSWDO) ang medical assistance sa mga pasyente na hindi available ang niresetang gamot ng doktor. Habang nagkaroon din ng Veterinary Medical Mission ang Office of the Veterinarian para sa may mga alagang hayop.
Naibahagi rin sa bawat barangay ng bayan ng Perez ang mga essential medicines na magsisilbing pantawid na tugon para sa kanilang mga iniindang sakit.
Ipinapaabot ng Pamahalaang Panlalawigan ng Quezon ang pasasalamat sa parating pakikipagbalikatan ng mga doktor, espesyalista, at ospital upang maging possible ang programang tumutugon sa mga pangkalusugan na suliranin ng bawat Quezonian saan man sulok sila ng lalawigan naroroon.
Source: Quezon PIO