NEWS AND UPDATE

Ground Breaking Ceremony of Alabat Wind Power Project | May 09, 2024

Pinakamataas na Windmills sa buong Pilipinas, itatayo na sa Alabat Island!
Pormal nang ginanap ngayong araw, Mayo 9 ang groundbreaking ceremony ng Alabat Wind Power Project na naisakatuparan sa pangunguna ng Alternergy Holdings Corporation, matapos ang halos anim na taong paghahanda at pag-aaral ng buong proyekto.
Ang proyektong ito ang kaunahang wind mills na nakaharap sa dagat pasipiko, at magiging pinakamataas na tore ng hangin sa Pilipinas kung saan walong windmills ang itatayo na nakapaligid sa nasabing isla.
Masaya namang si Governor Doktora Helen Tan sapagkat ang isa sa mga pangarap na proyekto at matutupad na sa pamamagitan ng kanyang mahusay na pamumuno at sigurong magpapatuloy katuwang ang Sangguniang Panlalawigan ng Quezon sa pangunguna ni Vice Governor Third Alcala.
Matatandaang noong siya’y Congresswoman pa sa ika-apat na distrito ng Quezon ay kanyang iniendorso sa Department of Energy (DOE) ang nasabing proyekto na ngayon ay nagbunga.
Labis din ang pasasalamat ng gobernadora sa mga nasyonal na ahensya na naging katuwang upang maging mabilis ang prosesong maisakatuparan ang napakalaking proyekto na magbubukas ng mga oportunidad para sa mga mamamayan ng AlQueRez Island.
Samantala, personal na dumalo at nagpakita ng pagsuporta sa isinagawang programa sina Vice Governor Third Alcala, 4th District Congressman Atorni Mike Tan, Alternergy Holdings Corporation Chairman – Vincente Perez Jr., Alabat Wind Power Corporation President – Gerry Magbanua, Alternergy Holdings Corporation President – Knud Hedeager, Board Members ng Sangguniang Panlalawigan,at iba’t-ibang kawani mula sa nasyonal na ahensya.
Source: Quezon PIO

Lingap sa Mamamayan Libreng Gamutan

Mga kalalawigan, sa darating na MAY 10 ay magkakaroon ng libreng serbisyong gamutan sa bayan ng SAN ANDRES, at sa MAY 11 naman ay sa bayan ng MULANAY.
Ito na ang inyong pagkakataon na makapagpatingin sa doktor at espesyalista upang alamin ang kalagayan ng inyong kalusugan.
Ilan sa mga serbisyong hatid ng Medical Team ay libreng Medical Check-up, Derma Check-Up, ENT Check-up, Eye Check-up, Orthopedic Check-up, Minor Surgery, Ultra Sound, X-Ray, ECG, FBS/RBS, Urinalysis, CBC, Tuli, HIV Counseling and Testing, PCV 23 & HPV Vaccination, Dental Extraction, OB-Gyne Check-up, Surgical Screening, at Cervical Cancer Screening.
Source: Quezon PIO

Ika-95 na Pangkaraniwang Pulong ng Sangguniang Panlalawigan ng Quezon | May 06, 2024

Para sa paghahatid ng tuloy-tuloy na serbisyo publiko sa buong Lalawigan ng Quezon, isinagawa ngayong araw ng Lunes ika-6 ng Mayo, ang ika-95 na Pangkariniwang Pulong ng Sangguniang Panlalawigan na kung saan ay tinalakay at ipinasa ang mga resolusyon na kinakailangan upang mapagtibay ang mga programa at proyekto na mapakikinabangan ng bawat mamamayang Quezonian.
Kinalala sa nasabing pagpupulong ang bagong talagang Provincial Government – Environment and Natural Resources Officer na si EnP John Francis L. Luzano MPA na magiging matibay na kabalikatan ng Pamahalaang Panlalawigan sa pagpapanatili ng malinis na kapaligiran at malusog na likas na yaman.
Source: Quezon PIO

Benchmarking on AICS Web-based System | May 07, 2024

TINGNAN: Nagsagawa ng Benchmarking on Aid to Individuals in Crisis Situation (AICS) Web-Based System ang Provincial Government of Batangas sa Quezon Provincial Social Welfare and Development Office (PSWDO) at Provincial Information Communication and Technology Office (PICTO) nitong Mayo 7, 2024.
Ang Web-Based System ng AICS ay binuo ng PICTO at PSWDO dahil sa layunin ni Governor Doktora Helen Tan na mas mapaigting ang mabilis, accessible, at transparent na pagbibigay ng tulong sa ating mga kalalawigan na nangangailangan sa pamamagitan ng mga 3rd party providers gaya ng ospital, laboratory clinics, parmasya, at punerarya.
Isa itong patunay na epektibo ang pamahalaang panlalawigan ng Quezon sa pagbibigay ng mga tulong sa pamamagitan ng AICS.
Source: Quezon PIO

Quezon Sports Camp 2024 – Sampaloc, Quezon

Isa ka ba sa mga kabataang Quezonian na manlalaro ng anumang larangan sa isports?
Nagsimula noong May 3, 2024 ang QUEZON SPORTS CAMP 2024 na tumagal ng 3 araw sa bayan ng Sampaloc, Quezon. Layon ng Pamahalaang Panlalawigan sa Pamagitan ng Provincial Sports Office na pinamumunuan ni Coach Aris Mercene na makapagbigay dagdag kaalaman at upang muling mabalikan ang mga dapat tandaan sa paglalaro ng iyong piniling larangan ng isports.
Pwedeng-pwede makilahok ang mga kabataang may edad 9 hanggang 18, babae man o lalaki, basta’t may nag-aalab na puso at nais mas mapalawak ang kanilang kagalingan.
Narito ang mga laro na pwedeng lahukan.
Basketball
Taekwondo
Boxing
Chess
Badminton
Swimming
Athletics
Table Tennis
Tandaan lamang ang mga sumusunod na lugar at petsa kung saan gaganapin ang nasabing sports camp:
* April 22-29 (Polillo Group of Islands)????
* May 3-5 (Sampaloc, Quezon)????
* May 10-12 (San Antonio, Quezon)
* May 17-19 (San Francisco, Quezon)
* May 24-26 (San Andres, Quezon)
* June 7-9 (Plaridel, Quezon)
* June 10-14 (Mauban, Quezon)
* June 15 & 16 (Plaridel, Quezon)
Kita-kits!
Source: Quezon Sports Office

HEAT INDEX FORECAST | May 06-07, 2024

GAANO BA KAINIT ANG PANAHON?
Ang init ng panahon na nararamdaman ng katawan ng tao (apparent temperature) ay hindi akmang nasusukat gamit lamang ang temperatura ng hangin (air temperature). Ito ay mas tamang naitataya kung isasama ang datos ng alinsangan o halumigmig (relative humidity.) Ang impormasyon na ito at tinatawag na HEAT INDEX at ito ay matutukoy gamit ang Heat Index Chart.
MGA DAPAT NA GAWIN SA MAINIT NA PANAHON:
Manatili sa loob ng bahay at iwasan ang pagbabad sa init ng araw
Uminom ng sapat na dami ng tubig at iwasan ang pag-inom ng tsaa, kape, soda, at alak
Gumamit ng payong at sombrero bilang proteksyon sa init
Magsuot ng presko at light colored na mga damit
https://www.pagasa.dost.gov.ph/climate/climate-heat-index
Source: Quezon PDRRMO

Poultry Stakeholder’s Forum | May 02, 2024

Isinagawa nitong araw ng Huwebes, Mayo 2 ang First Quezon Poultry Stakeholder’s Forum sa 3rd floor, Conference Hall, Old Capitol Building sa pangunguna ng tanggapan ng Panlalawigang Beterinaryo sa pamununo ni PGDH-Provincial Veterinarian Dr. Flomella A. Caguicla.
Dinaluhan ito ng iba’t-ibang kinatawan at mga beterinaryo ng mga farm operators mula sa buong lalawigan ng Quezon at maging sa iba’t-ibang lugar sa labas ng lalawigan. Kabilang sa dumalo sina Bokal Jerry Talaga bilang Vice Chairman ng Committee on Agriculture, Agricultural Center Chief II Dr. Milcah Valente, Agricultural Center Chief I Dr. Philip Augustus Maristela, Veterinarian III Dr. Maria Cecilia Martinez, at Veterinarian IV Dr. Adelberto Ambrocio.
Layon ng nasabing forum na mapag-usapan ang Poultry Industry sa Lalawigan at kung ano ang mga suliraning kinahaharap patungkol sa pangangalaga ng mga hayop. Sa naging diskusyon, tinalakay ni Dr. Dennis V. Umali mula sa University of the Philippines Los Baños ang patungkol sa Avian Influenza (Bird Flu) gayundin ang estado ng sakit na ito sa bansa na ibinahagi naman ni Dr. Arlene Asteria V. Vytiaco mula sa Bureau of Animal Industry.
Ang pag-aalaga ng hayop na pinagkukunan ng iba’t-ibang produkto ay malaking bahagi ng Agrikultura at Ekonomiya kung kaya’t patuloy na nakikibahagi ang Pamahalaang Panlalawigan sa pagpapabuti ng kapakanan ng mga hayop at makatulong sa kabuhayan ng mga mamamayan sa Lalawigan.
Source: Quezon PIO

CALABARZON Regional Development Plan 2023-2028 – Quezon Provincial Road | May 02, 2024

Para sa patuloy na pag-asenso ng buong rehiyon kabilang ang lalawigan ng Quezon, iprinisenta ang CALABARZON Regional Development Plan 2023-2028 Quezon Provincial Roadshow nitong Huwebes, Mayo 2.
Nagsisilbing instrumento ang RDP para sa mga plano sa programa at proyekto sa patuloy na pag-unlad at pagpapabuti ng kalagayan ng isang lugar pagdating sa ekonomiya at pagtaas ng antas ng pamumuhay ng mamamayan.
Kasama sa mga iprinesenta ng National Economic Development Authority (NEDA) IV-A
ang mga pagawaing imprastraktura tulad ng tulay, mga pangunahing kalsada, by-pass road, ospital, mga gusali, irigasyon, at iba pa.
Nakaayon dito ang Quezon Provincial Development and Physical Framework Plan (QPDPFP), kung saan pangunahing programa ni Governor Doktora Helen Tan ang HEALING Agenda o Health, Education, Agriculture, Livelihood, Infrastructure, Nature and Tourism, and Good Governance.
Nagkaroon din ng Talk Show upang makapagbahagi ang bawat isa ng mga suwestiyon at ideya at nagpapaalala na sa pag-iimplementa ng RDP at QPDPFP ay kinakailangan ng partisipasyon ng bawat isa upang makamit ang layuning pag-unlad.
Dumalo sa nasabing programa sina NEDA IV-A ARD Carmela P. Matabang, Vice Governor Third Alcala, Provincial Administrator Manny Butardo, Sangguniang Panlalawigan Members, Chief Execuitive ng iba’t ibang bayan sa lalawigan ng Quezon, at mga katuwang na ahensya at organisayon.
Patuloy ang Pamahalaang Panlalawigan sa pagpaplano ng mga komprehensibong programa at proyekto para sa maunlad na lalawigan ng Quezon.
Source: Quezon PIO

Soon to Rise Windmills in Alquerez Island

Magandang balita, mga Kalalawigan!
Itatayo na ang Windmill sa Isla ng Alabat-QuezonQuezon-Perez (AlQueRez) matapos ang ilang taong paghahanda at pag-aaral.
Ang naturang proyekto ay inisyatiba ni Governor Doktora Helen Tan noong siya ay Congresswoman pa ng ika-apat na Distrito ng Lalawigan sa pamamagitan ng pag-endorso sa Department of Energy (DOE) noong taong 2018 at ngayon ay napabilis ang proseso dahil sa mahusay na pamumuno ng Gobernadora katuwang ang Sangguniang Panlalawigan sa pangunguna ni Vice Governor Third Alcala.
Ang Windmill Power Project na ito ay itatayo at isasakatuparan sa pangunguna ng Alternergy (pioneer in renewable power) Alabat Wind Power Corporation sa pangunguna ng kanilang presidente, Mr. Gerry P. Magbanua.
Ang windmill ay isang magandang paraan upang makalikha ng enerhiya o ng kuryente mula lamang sa pwersa ng hangin. Bukod sa ito ay mas ligtas gamitin dahil hindi na kinakailangang masira at madamay ang kapaligiran, ito rin ay magbibigay ng mas maraming oportunidad para sa mga mamamayang nangangailangan ng hanapbuhay.
Source: Quezon PIO

Multi-Stakeholder Deed Dive on Universal Health Care (UHC) | May 2

Isinagawa ang isang multi-stakeholder deep dive sa implementasyon ng Universal Health Care (UHC) sa Rural Health Unit (RHU) ng Pagbilao, Quezon noong ika-2 ng Mayo 2024 na dinaluhan nina Executive Assistant John Francis L. Luzano na tumayong kinatawan ni Gov. Tan, Provincial Health Officer Dr. Kristin Mae-Jean M. Villaseñor, Quezon Provincial DOH Officer (PDOHO) Dr. Juvy Paz Purino, PhilHealth Regional Office IV-A (PRO IV-A) Regional Vice President Dr. Dean Reynes, Pagbilao Mayor Angelica “Ate Gigi” Portes Tatlonghari, at Municipal Health Officer Dr. Rikki Tolentino.

Ang nasabing aktibidad ay bahagi ng Bayang Malusog – Provincial Leadership Development Program (PLDP) ng Department of Health (DOH) sa pakikipagtulungan sa Zuellig Family Foundation (ZFF). Layunin ng PLDP na palakasin ang mga lider sa kalusugan upang maging mga kampyon ng UHC.

Bilang pangunahing may-akda ng UHC Law, hangad ni Governor Doktora Helen Tan ang mabisang implementasyon ng UHC sa lalawigan kabilang ang pagpapatupad ng mga proyekto at aktibidad na nakatuon sa health promotion, pagkakapantay-pantay sa kalusugan, kalidad, at pagiging accessible ng serbisyo medikal lalo’t higit sa mga geographically isolated at disadvantaged areas (GIDA). Gayunpaman, may mga hadlang sa pagpapabilis ng UHC na sinuri sa deep dive activity tulad ng hamon sa rehistrasyon ng PhilHealth at implementasyon ng mga serbisyong Konsulta.

Maraming mga pamamaraan ang ginamit sa deep dive: (1) Firsthand experience sa hakbang-sa-hakbang na proseso sa pagkuha ng outpatient services, (2) Pagsusuri sa pag-encode ng Konsulta (3) Pagsusuri ng mga rekord at (4) Panayam sa mga pasyente at mga health workers.

Sa UHC Law, lahat ng mga Pilipino ay awtomatikong miyembro ng PhilHealth, at agad na nakatatanggap ng mga benepisyo sa pamamagitan ng National Health Insurance Program. Subalit sa pagbisita sa RHU ng Pagbilao, may mga pasyenteng hindi miyembro ng PhilHealth, hindi rehistrado sa Konsulta at may ilang nagsasabing miyembro ngunit walang rekord sa sistema ng PhilHealth. Gayunpaman, ang libreng serbisyo ay awtomatikong ibinibigay sa lahat ng mga kliyente ng RHU ngunit hindi ito maibilang na physical accomplishment na kinakailangan upang matugunan ang pangangailangan para sa susunod na frontload ng Konsulta.

Ayon sa pagsusuri ng mga serbisyong Konsulta, napag-alaman na maayos ang sistema ng RHU Pagbilao sa paghahatid ng serbisyong medikal tulad ng konsultasyon, dental services, laboratory services, X-ray, TB DOTS, lying-in, animal bite treatment, at iba pa. Mayroon ding mga ipinapatayo at pinalalawak na pasilidad pangkalusugan upang mapabuti pa ang pangmatagalang serbisyo medikal na handog ng LGU.

Ang isa pang probisyon ng UHC law ay ang pagpapanatili ng Health Information System (HIS) na popondohan ng DOH at PhilHealth. I-uupload ang datang makakalap ng HIS sa pambansang health information system na angkop sa pamantayan ng DOH, PhilHealth, Department of Information and Communications Technology (DICT), at National Privacy Commission. Sa kasalukuyan, eKonsulta ang sistemang ginagamit sa RHU Pagbilao at mga government primary care facilities sa Quezon, subalit hindi lahat ng kliyenteng napagsisilbihan ng RHU ay napapabilang sa sistema sapagkat ang maaari lamang itala ay ang mga pasyenteng may aktibong PhilHealth identification Number (PIN). Dahil dito, maraming papeles ang kinakailangan pang i-encode at hindi naitatala ang kabuuang bilang ng benepisyaryo sa sistema ng PhilHealth.

Sa pagtatapos ng aktibidad, napagkasunduan ng Pamahalaang Panlalawigan at ng LGU Pagbilao na palawigin pa ang pagpapalaganap ng impormasyon ukol sa iba’t ibang programang pangkalusugan lalo na sa PhilHealth Registration at sistemang Konsulta. Patuloy namang nakikipag-ugnayan ang Pamahalaang Panlalawigan sa mga health information system providers para sa pinaka-epektibong province-wide health system habang nagpahayag ng suporta ang DOH sa pamamagitan ng PDOHO para sa pagpapalakas ng health human resources at paglalaan ng pondo para sa pagpapabuti ng pasilidad na pangkalusugan.

Source: Quezon PIO