NEWS AND UPDATE

Solo Parents’ Day Celebration | July 16, 2024

Solo Parent na Rehistrado, sa Gobyerno Tiyak na Protekdado!

Sa pagtutulungan ng Provincial Social Welfare and Development Office (PSWDO) at Panlalawigang Kalipunan ng Nag-iisang Magulang sa Quezon (PKNM-Q), produktibong ginanap ngayong araw ng Martes, Hulyo 16 ang kaunahang Provincial Solo Parents’ Day Celebration.

Layunin ng nasabing programa na mabigyang pugay ang mga Quezonian solo parent na patuloy na itinataguyod mag-isa ang maayos na buhay ng kanilang mga anak. Dinaluhan ito ng aabot sa 250 solo parents mula sa iba’t-ibang bayan sa apat na distrito ng lalawigan.

Nakiisa at nagpakita naman ng pagsuporta si Governor Doktora Helen Tan, at kanyang naibahagi ang pagpapalakas ng Solo Parent Act sa lalawigan na magbibigay daan upang makakuha ng sapat at nararapat na benepisyo at proteksyon ang bawat magulang na mag-isang bumubuhay sa kanyang anak, kung kaya naman hinihikayat niya ring magparehistro ang mga ito na sila’y kabilang sa sektor ng solo parent.

Pinangunahan din ng gobernadora ang panunumpa ng Solo Parents Municipal Federation Officers, at nagkaroon naman ng talakayan na layong magbigay suporta sa hirap at sakrispisyong ginagampanan ng mga solo parent masiguro lamang na maayos ang kinabukasan ng kanilang anak.

Samantala, nakadagdag saya sa mga dumalong solo parent ang isinagawang raffle draw kung saan nakapah-uwi sila ng iba’t-ibang papremyo.

Source: Quezon PIO

KADIWA ng Pangulo sa Kapitolyo | July 16, 2024

Murang bilihin handog ng ika-pitong KADIWA ng Pangulo sa Kapitolyo ngayong araw ng Martes, Hulyo 16 sa Perez Park, Lucena City. Makabibili rito ng mga produktong lokal gaya ng bigas, itlog, gulay, prutas at iba pa.

Tiniyak naman ng Pamahalaang Panlalawigan ang pakikiisa at pagsuporta sa programang ito ng Nasyunal na Pamalahaan na nakapagbibigay ng malaking tulong sa mga Quezonian sa pamamagitan ng murang halaga ng mga produkto gayundin ang ay nakapagbibigay ng hanapbuhay sa paggawa at pagbenta ng mga ito.

Abangan ang muling pagsasagawa ng proyektong inisyatibo ni Pangulong Ferdinand “Bongbong” Marcos Jr. sa mga sumusunod na petsa:

• August 15, 2024 (Thursday)

• September 13, 2024 (Thursday)

• October 15, 2024 (Tuesday)

• November 15, 2024 (Friday)

• December 13, 2024 (Friday)

Source: Quezon PIO

Paglulunsad ng In-Hospital BUCAS AGAP Center | July 15, 2024

TINGNAN: Para sa patuloy na pagsuporta at pagtalima ng Universal Health Care hindi lamang sa lalawigan ng Quezon kundi sa buong Pilipinas, malugod na nagtungo si Governor Doktora Helen Tan sa Amang Rodriquez Memorial Medical Center, Marikina City upang makiisa sa paglulunsad ng In-Hospital BUCAS AGAP Center na ginanap ngayong araw ng Lunes, Hulyo 15.

Isang primary health hub ang BUCAS o Bagong Urgent Care and Ambulatory Service na layong maghatid ng mga abot-kayang serbisyong pangkalusugan tulad ng Outpatient Consultations, Laboratory Tests, Minor Surgeries, at Emergency Care.

Malaking tulong naman ang nasabing health hub na ito upang mas mapabuti pa ang sistema ng kalusugan sa bansa para sa tuloy-tuloy na malusog na pamumuhay ng bawat Pilipino.

Source: Quezon PIO

Ika-105 Pangkaraniwang Pulong ng Sangguniang Panlalawigan ng Quezon | July 15, 2024

Sa pagsusumikap na mas mapaigting pa ang mas maayos at maunlad na lalawigan ng Quezon sa usaping lehislatura, ginanap ang ika-105 Pangkaraniwang Pulong ng Sanggunian ngayong araw ng Lunes, Hulyo 15.

Aprubado ang ordinansang bayan ng munisipalidad ng Dolores na magbibigay patnubay sa pagpapatupad ng Philippine Health Insurance Corporation, PhilHealth Circular no. 2024-0001 o ang mga patakaran sa pagsasaayos ng case rates bilang batayan ng distribution system ng PhilHealth reimbursement fund alinsunod sa operasyon ng accredited health facilities ng nasabing pamunuan.

Bilang pagkilala naman sa pagsisikap ng mga kabataan sa Patnanungan, inaprubahan sa sesyon ang ordinansang bayan na ideklara ang August 12 bilang ARAW NG KABATAAN sa Patnanungan.

Asahan pa ang patuloy na pag-apruba ng mga kautusang bayan, ordinansa at resolusyon na mapapakinabangan ng mga mamamayan na magbibigay daan tungo sa pag-unlad ng lalawigan sa susunod na mga sesyon.

Source: Quezon PIO

Lingap sa Mamamayan Libreng Gamutan | July 14, 2024

Sa pagpapatuloy ng paghahatid ng Libreng Serbisyong Gamutan na handog ng Pamahalaang Panlalawigan ng Quezon sa pangunguna ni Governor Doktora Helen Tan at Vice Governor Third Alcala, sunod na dinala ito sa bayan ng Pagbilao nitong araw ng Linggo, Hulyo 14.

Katuwang pa rin ang mga doktor at espesyalista mula sa iba’t-ibang ospital sa Maynila at lalawigan ng Quezon, dinagsa ng 4,855 Pagbilawin ang nasabing libreng medical, surgical, at dental caravan.

Malugod namang tinanggap ng bawat Barangay sa Pagbilao ang mga essential medicines upang magsilbing pantawid na tugon sa mga may iniindang sakit.

Bukod sa Medical Mission, dala rin ng Office of the Provincial Veterinarian ang libreng konsultasyon, kapunan (spay & neuter), pagbabakuna ng anti-rabies, at pamamahagi ng libreng veterinary medicines kung saan 472 na may mga alagang hayop ang naging benepisyaryo.

Samantala, sa tulong ng Provincial Social Welfare and Development Office (PSWDO) at Provincial Treasurer’s Office (PTO) ay naipamahagi sa 220 mamamayan ng nasabing bayan ang tulong pinansyal mula sa programang AICS o Aid to Individuals in Crisis Situation.

Source: Quezon PIO

Libreng Serbisyong Gamutan sa Bayan ng Pagbilao | July 14, 2024

TINGNAN: Matagumpay na naihatid ng Medical Team sa bayan ng Pagbilao ngayong araw, Hulyo 14 ang Libreng Serbisyong Gamutan na patuloy na ibinababa ng Pamahalaang Panlalawigan ng Quezon sa pangunguna ni Governor Doktora Helen Tan at Vice Governor Third Alcala.

Narito ang ilang kaganapan sa nasabing Medical Mission.

Source: Quezon PIO

Lingap sa Mamamayan Libreng Gamutan | July 13, 2024

Maulan na ginanap nitong araw ng Sabado, Hulyo 13 sa bayan ng Mauban ang programang “Lingap sa Mamamayan, Libreng Gamutan” na handog ng Pamahalaang Panlalawigan ng Quezon sa pangunguna ni Governor Doktora Helen Tan katuwang si Vice Governor Third Alcala.

Sa layunin at misyong mailapit ang serbisyo ng Kapitolyo sa bawat Quezonian, umabot sa 4,295 na Maubanin ang naging benepisyaryo ng iba’t-ibang serbisyong medikal gaya ng libreng medical check-up, bunot ng ngipin, minor surgery sa may maliit na bukol, tuli, eye check-up, ENT, derma, X-RAY, Ultrasound, ECG, CBC, Urinalysis, cervical cancer screening, at pagbabakuna ng PCV 23.

Nakapamahagi rin ng nagkakahalagang P55,000 essential medicines sa bawat Barangay ng nasabing bayan na magsisilbing pantawid tulong at tugon sa mga may iniindang sakit.

Bukod sa medical mission, handog naman ng Office of the Provincial Veterinarian ang libreng konsultasyon, kapunan (spay & neuter), pagbabakuna ng anti-rabies, at pamamahagi ng libreng veterinary medicines para sa 487 na may mga alagang hayop.

Samantala, kasabay na isinagawa sa bayan ng Mauban ang pagbibigay ng tulong pinansyal ng Provincial Social Welfare and Development Office (PSWDO) at Provincial Treasurer’s Office (PTO) na mula sa programang AICS o Aid to Individuals in Crisis Situation. Tinanggap ng 60 Maubanin ang educational assistance habang 36 naman ang nakatanggap ng assistance para sa medical, burial at iba pang pangangailangan. Mayroong ding 251 benepisyaryo ng ESA o Emergency Shelter Assistance.

Source: Quezon PIO

Libreng Sebisyong Gamutan sa Bayan ng Mauban | July 13, 2024

TINGNAN: Ilang kaganapan sa isinagawang Libreng Sebisyong Gamutan sa bayan ng Mauban ngayong araw ng Sabado, Hulyo 13 na handog ng Pamahalaang Panlalawigan ng Quezon sa pamumuno ni Governor Doktora Helen Tan at Vice Governor Third Alcala.

Source: Quezon PIO

Deaf Association of Quezon Province National Men & Women’s 3×3 Basketball Tournament | July 12, 2024

Masiglang ginanap ngayong araw, Hulyo 12 sa Quezon Convention Center ang opening ceremony ng Deaf Association of Quezon Province (DAQP) National Men’s and Women’s 3×3 Basketball Tournament sa pangunguna ni DAQP President – Trivor U. Latayan.

Nagsilbing host province ang Quezon ng gaganaping tatlong araw (July 12-14) na pasiklaban sa larangan ng basketbol ng mga manlalarong kabilang sa deaf community na mga mula pa sa iba’t-ibang probinsya sa Pilipinas tulad ng Pampanga, Cavite, Zambales, Metro Manila, Batangas, Laguna, Olongapo, Rizal, at Bulacan.

Ipinaabot naman ni Governor Doktora Helen Tan ang kanyang mensahe at pagsuporta sa pamamagitan ni Executive Assistant II Atty. Kim Kenneth Pascua, kung saan ay binigyang-diin na malaking bagay na may mga programang pangpalakasan para sa bawat Pilipino kabilang na ang deaf community upang maisulong ang malusog na lifestyle.

Source: Quezon PIO

Sustainable Livelihood Program | July 12, 2024

Sa pakikipagbalikatan ng Pamahalaang Panlalawigan ng Quezon at ni Governor Doktora Helen Tan sa Department of Social Welfare and Development (DSWD), isinagawa sa iba’t-ibang bayan sa lalawigan ang pag-oorganisa ng asosasyon ng SLP o “Sustainable Livelihood Program” na sinimulan nitong nakaraang Hulyo 8 at nagtapos ngayong araw, Hulyo 12.

Ang nasabing akitibidad ay naisakatuparan sa tulong ng Provincial Satellite Offices na naglalayong matukoy at ma-assess ang 667 na indibidwal na mga magiging benepisyaryo ng programa.

Sa loob ng isang linggong, produktibong nagkaroon ng pagsasanay ang mga benepisyaryo patungkol sa organizational development at leadership upang maging handa sila sa asosasyon. Inaasahan naman na ang 30 grupong na-organisa ay makakabuo ng kani-kaniyang sustenableng negosyo na magsisilbi nilang alternatibong pangkabuhayan.

Samantala, nagmula ang mga benepisyaryo sa iba’t-ibang lugar sa bayan ng San Antonio, Tiaong, Dolores, Candelaria, Sariaya, at Lucena City.

Source: Quezon PIO