3rd Surgical Support Caravan | April 24, 2023

Hindi natatapos ang mga isinasagawang hakbangin ng Pamahalaang Panlalawigan sa pangunguna ni Gov. Doktora Helen Tan upang patuloy na masolusyonan ang mga medikal na suliranin ng bawat mamamayan sa probinsya, kung saan ngayong araw ng Lunes, Abril 24, sa ikatlong pagkakataon ay umarangkada muli ang Surgical Caravan sa Quezon Medical Center (QMC).

Sa pakikipagbalikatan sa Philippine Heart Center, East Avenue Medical Center, Philippine College of Surgeon Southern Tagalog, Quezon Medical Society, at National Kidney and Transplant Institute ay mabibigyan ng libreng operasyon ang may mga problema sa kindey, may bato sa apdo, luslos, at iba pang sakit mula Abril 24 hanggang Abril 28.

Gamit ang nilaang pondo ng iba’t-ibang institusyon ay nagkaroon naman ng blessing ng bagong Laparoscopy Tower ang nasabing ospital, na kung saan inihayag ni Gov. Tan na malaki ang kontribusyon ng medikal na kagamitan na ito upang mapadali ang proseso para sa malinaw na biswal at dokumentasyon ng mga operasyon.

Samantala, tinalakay naman ni Chief of Hospital Dr. Juan Eugenio Fidel Villanueva ang patungkol sa mga medikal na aktibidad na naganap noong nakaraang linggo, nabibilang dito ang walkthrough sa iminumungkahing ekstensiyon ng X-Ray Laboratory at ang pagsasaayos ng Emergency Room.

Source: Quezon PIO

Distribution of AID to Barangay, Medicine & BP Apparatus – San Francisco & San Andres, Quezon | April 22, 2023

Naisagawa rin ngayong araw ang pamamahagi ng Aid to Barangay gayundin ang BP apparatus at iba’t-ibang gamot para sa bayan ng San Francisco at San Andres.

Kasama ang mga pinuno ng mga barangay ay kanilang inilahad ang mga suliranin na nais nilang masolusyonan, kung saan namang pinakinggan ni Gov. Doktora Helen Tan upang mabawasan ang kanilang mha pasanin.

Source: Quezon PIO

Lingap sa Mamamayan, Libreng Gamutan – Day 4: San Francisco, Quezon | April 22, 2023

“Hindi nyo na ako kailangang hanapin, dahil ilalapit namin sa inyo ang serbisyo ng Kapitolyo”

Sa pangunguna ni Gov. Doktora Helen Tan, naging matagumpay ang huling araw ng Medical Mission sa Bondoc Peninsula, naihatid ang iba’t-ibang libreng serbisyong medikal sa mga mamamayan mula sa bayan ng San Francisco.

Marami ang nabigyang konsultasyon ng mga doktor at espesyalista, may mga nabigyan din ng libreng tuli, anti-pneumonia vaccination, bunot ng ngipin, minor surgery ng bukol sa katawan, at laboratory examinations.

Malaki ang pasasalamat ng Pamahalaang Panlalawigan ng Quezon sa walang sawang pakikipagbalikatan ng RAKK Prophet Medical Center Inc., Solcom Rizal Medical Center, Batangas Medical Center, Integrated Provincial Health Office (IPHO), Rizal Eye Center, Rural Health Unit, at Quezon Medical Center (QMC).

Gayundin sa Office of the Provincial Veterinarian (OPV), Provincial Social Welfare and Development Office (PSWDO), at Provincial Treasurer’s Office (PTO) na kasama ring nagbigay serbisyo para sa ating mga kalalawigan.

Source: Quezon PIO

4k General Assembly & Distribution of AID to Barangay, Medicine and BP Apparatus | April 21, 2023

Walang sinayang na oras ang Pamahalaang Panlalawigan ng Quezon sa pagbisita sa bayan ng San Narciso, nakipagpulong din si Gov. Doktora Helen Tan sa mga miyembro ng 4k Federation at mga pinuno ng bawat barangay upang magkaroon ng diskusyon ukol sa kanilang mga suliraning nararanasan.

Ipinaabot din ang mga tulong na lubos na magagamit upang mapanatili ang kaayusan at maiangat ang kalalagayan ng kanilang bayan patungo sa mas maunlad na pamumuhay ng bawat mamamayan.

Source: Quezon PIO

Lingap sa Mamamayan, Libreng Gamutan – Day 3: San Narciso, Quezon | April 21, 2023

Ang mataas na kalidad ng serbisyong pangkalusugan ay isa sa pinagtutuunan ng pansin na maibigay ni Gov. Doktora Helen Tan para sa mga mamamayang Quezonian, lalo na sa mga naninirahan sa liblib at pinakasulok na lugar sa Quezon.

Ngayong ikatlong araw ng Medical Mission sa Bondoc Peninsula, nag-tungo ang medical team sa Brgy. San Vicente, San Narciso upang maiabot ang mga libreng medical check-up, bunot ng ngipin, pagpapatuli, laboratory examination, anti-pneumonia vaccination, at minor surgery para sa mga may bukol sa katawan.

Sa kabila ng kakulangan ng pondo ay patuloy pa rin ang pagsisikap ng pamahalaang panlalawigan sa pagbibigay ng serbisyo sa lahat ng nangangailangan.

Source: Quezon PIO

1st Quarter Meeting and Election of Provincial Federation Officers of Solo Parents | April 20, 2023

Isang malaking responsibilidad ang pagpapamilya at nagiging mas komplikado ito kung walang kaakibat ang indibidwal sa pagpapalaki ng kanyang anak. Nababatid ng pamahalaang panlalawigan ang pinagdaraanan ng mga solo parents kung kaya isinagawa ang 1st Quarter Meeting ng Quezon Provincial Federation Officers of Solo Parents ngayong araw, Abril 20.

Ang pagpupulong na ito ay pinangunahan ng Provincial Social Welfare and Development Office bilang bahagi ng 1st National Solo Parents Day (April 15) & Week (April 17-21). Pinasimulan ito ni PSWDO na si Ms. Sonia S. Leyson na nagpahayag ng kanyang panghanga at respeto sa mga solong magulang na patuloy na inaaruga ang kanilang mga anak sa kabila ng mga krisis na nangyayari sa ating bansa.

Sa pananalita naman ni Ms. Norliza N. Labitigan ay kanyang ipinaliwanag ang pangkalahatang-ideya ng Republic Act. No. 11861 o ang Expanded Solo Parent Welfare Act of 2020 na may layuning magkaroon ng makatarungang trato ang lipunan sa mga solong magulang. Kabilang dito ang pagbigay ng pangunahing pangangailangan ng pamilya, at pagtupad ng maluwag na oras ng trabaho na naaayon sa pangangailangan ng magulang na makasama ang kanyang anak/mga anak.

Ginanap din dito ang eleksyon ng mga bagong opisyal ng FSP para sa taong 2023 hanggang 2026 kasabay ang pagpaplano ng mga aktibidad ng pederasyon sa mga darating na panahon.

Patuloy na magbibigay ng suporta ang Pamahalaang Panlalawigan ng Quezon sa matagumpay na paghubog ng bagong lipunan para sa mga solong magulang ng ating lalawigan.

Source: Quezon PIO

4k General Assembly & Distribution of AID to Barangay, Medicine and BP Apparatus | April 20, 2023

Isinagawa rin sa bayan ng Buenavista ang pamamahagi ng Aid to Barangay at pakikipagpulong kasama ang mga kababaihan ng 4k, sa pangunguna pa rin ni Gov. Doktora Helen Tan.

Naipamahagi ang mga gamot at BP apparatus para sa bawat barangay ng nasabing bayan na lubos na makatutulong sa pagtugon sa problemang pangkalusugan na kanilang kinahaharap.

Samantala, binigyan kilala ang mga miyembro ng kababaihan na nagsisikap upang mas maging mabuti ang kanilang komunidad.

Source: Quezon PIO

Re-orientaion of Solid Waste Management Focal Persons | April 20, 2023

Kaugnay ng R.A. 9003 o ang tinatawag na Ecological Solid Waste Management Act, nagkaroon ng re-oryentasyon para sa mga Solid Waste Management Focal Persons mula sa iba’t-ibang tanggapan ng pamahalaang panlalawigan ng Quezon.

Pinangunahan ito ni Ms. Ellen Caleja, Supervising Administrative Officer mula sa Provincial Government – Environment and Natural Resources Office (PG-ENRO), kung saan itinalakay niya ang iba’t-ibang paraan kung paano mas mapapabuti ang pagpapairal ng wastong pagtatapon ng basura tulad ng tuloy tuloy na pagpapaalala sa tamang pagtatapon at pagsubaybay sa bawat opisina sa loob ng kapitolyo. Kabilang sa tinalakay ay ang responsibilidad ng bawat empleyado na magtapon ng basura sa tamang basurahan at hindi i-asa sa mga naka-talagang focal person ang trabaho.

Upang mas ma-engganyo ang bawat opisina ay nais na ibalik ang pagbibigay kilala sa opisinang may pinakamahusay na disiplina at magkakaroon ng insentibo, tulad ng mop at walis para sa magagawarang opisina.

Source: Quezon PIO

Fisherfolk General Assembly

Sa tulong ng Office of the Provincial Agriculturist, ngayon araw ng Huwebes, Abril 20, ay nakipagpulong si Gov. Doktora Helen Tan sa mga hanay ng mangingisda mula sa bayan ng Buenavista.

Tinakalay sa pulong ang ilang kahilingan na nais maipatupad upang mas maging maayos ang kanilang pangingisda, isa na rito ay ang masolusyunan ang malaking multa ng mga karatig bayan sa tuwing makakalagpas sa boundery ng kanilang pinagkukuhaan ng kanilang kabuhayan.

Bilang tugon, sinigurado ng gobernadora na hindi titigil ang pamahalaan upang matugunan ang iba’t-ibang suliran na kinahaharap ng sektor ng pangisdaan, kung saan kabilang sa proyektong ipapatupad para sa kanila ay ang pagbibigay ng mga alternatibong pagkakakitaan tuwing panahon ng walang huli sa karagatan.

Source: Quezon PIO

Lingap Sa Mamamayan, Libreng Gamutan Day 2: Buenavista, Quezon

Sa pagpapatuloy ng isinasagawang Medical Mission sa Bondoc Peninsula, sunod na isinagawa ito sa bayan ng Buenavista, kung saan nailahad ni Gov. Doktora Helen Tan na dapat lang seryosohin ang pag-aalaga ng ating kalusugan, kung kaya’t ang misyon na mailapit ang serbisyong medikal sa bawat Quezonian ay mahigit niyang pinahahalagahan at pinagsusumikapan na maibigay.

Kalakip nito, ipinapaabot ng pamahalaang panlalawigan ng Quezon ang taos-pusong pasasalamat sa bawat doktor, nurse, at espesyalista mula sa Batangas Medical Center, RAKK Prophet Medical Center Inc., Integrated Provincial Health Office (IPHO), Solcom Rizal Medical Center, Rizal Eye Center, Rural Health Unit, at Quezon Medical Center sa kanilang walang humpay na pakikipagbalikatan upang maging possible ang paghahatid ng libreng gamutan.

Bagamat hindi isang daan porsyento ang naibibigay na tulong sa ating mga kalalawigan ay sinigurado naman ni Gov. Tan na sa abot ng kanilang makakaya ay handang umalalay ang pamahalaan sa oras ng kanilang matinding pangangailangan.

Source: Quezon PIO