Pagbisita sa mga Pasyente ng Surgical Support Caravan | April 26, 2023

Kahapon, ika-26 ng Abril, nagsimula na ang ikatlong Surgical Support Caravan ng Pamahalaang Panlalawigan ng Quezon sa pangunguna ni Governor Doktora Helen Tan kasama ang mga doktor mula sa East Avenue Medical Center, Philippine College of Surgeon Southern Tagalog, Quezon Medical Society at Quezon Medical Center.

Personal na binisita ni Gov. Doktora Helen Tan ang mga pasyente na sasailalim sa operasyon ng nasabing programa sa Quezon Medical Center.

Magtatagal ang 3rd Surgical Support Caravan mula ika-26 hanggang ika-28 ng Abril na naglalayong makapagbigay ng pag-asa at agarang lunas sa mga iniindang karamdaman ng ating mga kalalawigang walang sapat na kakayanan na makapagpa-opera.

Source: Quezon PIO

3rd Surgical Support Caravan Opening Ceremony | April 26, 2023

Tuloy-tuloy ang isinasagawang Surgical Support Caravan sa Quezon Medical Center, kung saan ngayong ikatlong araw, Abril 26, dinaluhan ni Gov. Doktora Helen Tan ang inihandang seremonya para sa opisyal na pagsisimula ng isang linggong serbisyong medikal para sa ating mga kalalawigan na lubos na nangangailangan.

Kasama sila Medical Professional Staff Dr. Allan Troy Baquir ng East Avenue Medical Center at Dr. Executive Director Dr. Rose Marie Rosete-Liquete ng National Kidney and Transplant Institue, kanilang ibinahagi ang suporta sa adbokasiya na mapabuti ang healthcare system sa lalawigan ng Quezon.

Pinasalamatan naman ng gobernadora ang bawat kawani at institusyon sa walang sawang nakikipagbalikatan upang maihatid ang libreng pagpapaopera ng mga Quezonian.

Kaakibat nito, naibigay sa nasabing ospital ang ilang medikal na kagamitan na makatutulong ng lubos sa patuloy na pagpapaunlad ng pangkalusugan na kalagayan ng probinsya, tulad na lang ng C-Arm machine at ventillators.

Magtatagal ang surgical caravan na ito mula Abril 24 hanggang Abril 28.

Source: Quezon PIO

1st Quarter Meeting para sa Joint Provincial/City/Municipal Committee Against Trafficking-Anti Child Pornography – VAWC | April 25, 2023

Noong ika-25 ng Abril, 2023, isinagawa ang 1st Quarter Meeting para sa Joint Provincial/City/Municipal Committee Against Trafficking-Anti Child Pornography- VAWC. Ito ay dinaluhan ng mga miyembro ng Municipal Committee Against Trafficking mula sa lalawigan.

Ang pagpupulong ay pinangunahan nina Provincial Gender and Development Office Assistant Department Head Mr. Sedfrey Potestades at Ms. Aira Mae Davila kung saan tinalakay ang mga nakamit na layunin ng komite sa taong 2022.

Naisama rin sa talaan ang estatistika ng mga VAW o Violence Against Women mula sa Quezon Medical Center – Women and Children Protection Unit at Quezon Police Provincial Office – Women and Children Protection Desk.

Source: Quezon PIO

Mr. & Ms. A1 and Orally Fit Child 2023 | April 25, 2023

Ang lalawigan ng Quezon ay idineklarang may pinakamataas na rate ng Orally Fit Children o batang may pinakamagandang ngipin sa buong CALABARZON ayon kay Dr. Eliezer D. Apurado o “Dr. Bong”. Upang mapanatili ang pagkakaroon ng mabuting kalusugan ng ngipin ang mga Quezonians, pinangunahan ng Integrated Provinicial Health Office (IPHO) ang kauna-unahang Mr. and Ms. A1 and Orally Fit Child ngayong araw ng Martes, Abril 25 na ginanap sa SM City Lucena.

Ang nasabing programang ay nauugnay sa National Oral Health Program na ang layunin ay hikayatin ang mga mamamayan na pangalagaan ang kanilang mga ngipin upang maiwasan ang tooth decay, gum disease, at oral cancer.

Sa paglalahad ni IPHO Head Dr. Kristin Mae-Jean M. Villaseñor, kanyang pinasalamatan ang Government Dentists ng Quezon Province at sa mga naging parte upang maisagawa ang programa, kung saan naman ang 19 na partisipante ng kumpetisyon ay mga pre-schoolers mula sa iba’t ibang paaralan ng lalawigan na mga itinanghal na panalo sa kani-kanilang bayan, at ngayon ay nagsama-sama sa isang malaking paligsahan para sa titulo ng “Mr. and Ms. A1 and Orally Fit” ng Quezon Province.

Hangad naman ni Dr. Bong na maipatuloy ang mga ganitong klaseng programa sa mga susunod na taon sapagkat makatutulong ito sa malaking progreso ng pagdami ng orally fit children.

Source: Quezon PIO

SIM Card Registration, Extended ng 90 Days!

Ayon sa Malacañang ay aprubado na ang rekomendasyon ng DICT tungkol sa 90-day extension ng sim registration (July 25)

i-click ang link upang magregister.

SMART/TNT:

https://smart.com.ph/simreg

GLOBE/TM:

https://new.globe.com.ph/simreg

DITO:

https://dito.ph/RegisterDITO

Bulihan Festival 2023 | April 24, 2023

Ipinagdiwang ang ika-150 Pistang Parangal kay San Vincente Ferrer sa bayan ng Sampaloc. Kasabay nito ay sama-samang nagsaya ang mga Sampalucin sa ginanap na Grand Parade bilang bahagi ng Bulihan Festival.

Nakiisa rito si Governor Doktora Helen Tan, bilang suporta sa kanilang maliwanag na kapistahan. Sa kanyang mensahe ipinahayag niya ang pagkagalak sa pakikiisa ng mga mamamayan ng Sampaloc na siyang nagbigay kulay at tagumpay upang maisakatuparan ito.

Kasabay ng parada sa bayan ay nagkaroon din ng Sombrero Contest. Maiilaw at matitingkad na mga sombrero na gawa sa mga produktong buli na masinsinang pinagsumikapang gawin ng mga mamamayan dito. Nagsimula ang Bulihan Festival noong Abril 20 at magtatapos sa Abril 26.

Pangako naman na paglilingkod ng siksik at liglig galing sa tulong ng panginoon ang ihahatid ng pamahalaang panlalawigan.

Source: Quezon PIO

3rd Surgical Support Caravan | April 24, 2023

Hindi natatapos ang mga isinasagawang hakbangin ng Pamahalaang Panlalawigan sa pangunguna ni Gov. Doktora Helen Tan upang patuloy na masolusyonan ang mga medikal na suliranin ng bawat mamamayan sa probinsya, kung saan ngayong araw ng Lunes, Abril 24, sa ikatlong pagkakataon ay umarangkada muli ang Surgical Caravan sa Quezon Medical Center (QMC).

Sa pakikipagbalikatan sa Philippine Heart Center, East Avenue Medical Center, Philippine College of Surgeon Southern Tagalog, Quezon Medical Society, at National Kidney and Transplant Institute ay mabibigyan ng libreng operasyon ang may mga problema sa kindey, may bato sa apdo, luslos, at iba pang sakit mula Abril 24 hanggang Abril 28.

Gamit ang nilaang pondo ng iba’t-ibang institusyon ay nagkaroon naman ng blessing ng bagong Laparoscopy Tower ang nasabing ospital, na kung saan inihayag ni Gov. Tan na malaki ang kontribusyon ng medikal na kagamitan na ito upang mapadali ang proseso para sa malinaw na biswal at dokumentasyon ng mga operasyon.

Samantala, tinalakay naman ni Chief of Hospital Dr. Juan Eugenio Fidel Villanueva ang patungkol sa mga medikal na aktibidad na naganap noong nakaraang linggo, nabibilang dito ang walkthrough sa iminumungkahing ekstensiyon ng X-Ray Laboratory at ang pagsasaayos ng Emergency Room.

Source: Quezon PIO

Distribution of AID to Barangay, Medicine & BP Apparatus – San Francisco & San Andres, Quezon | April 22, 2023

Naisagawa rin ngayong araw ang pamamahagi ng Aid to Barangay gayundin ang BP apparatus at iba’t-ibang gamot para sa bayan ng San Francisco at San Andres.

Kasama ang mga pinuno ng mga barangay ay kanilang inilahad ang mga suliranin na nais nilang masolusyonan, kung saan namang pinakinggan ni Gov. Doktora Helen Tan upang mabawasan ang kanilang mha pasanin.

Source: Quezon PIO

Lingap sa Mamamayan, Libreng Gamutan – Day 4: San Francisco, Quezon | April 22, 2023

“Hindi nyo na ako kailangang hanapin, dahil ilalapit namin sa inyo ang serbisyo ng Kapitolyo”

Sa pangunguna ni Gov. Doktora Helen Tan, naging matagumpay ang huling araw ng Medical Mission sa Bondoc Peninsula, naihatid ang iba’t-ibang libreng serbisyong medikal sa mga mamamayan mula sa bayan ng San Francisco.

Marami ang nabigyang konsultasyon ng mga doktor at espesyalista, may mga nabigyan din ng libreng tuli, anti-pneumonia vaccination, bunot ng ngipin, minor surgery ng bukol sa katawan, at laboratory examinations.

Malaki ang pasasalamat ng Pamahalaang Panlalawigan ng Quezon sa walang sawang pakikipagbalikatan ng RAKK Prophet Medical Center Inc., Solcom Rizal Medical Center, Batangas Medical Center, Integrated Provincial Health Office (IPHO), Rizal Eye Center, Rural Health Unit, at Quezon Medical Center (QMC).

Gayundin sa Office of the Provincial Veterinarian (OPV), Provincial Social Welfare and Development Office (PSWDO), at Provincial Treasurer’s Office (PTO) na kasama ring nagbigay serbisyo para sa ating mga kalalawigan.

Source: Quezon PIO

4k General Assembly & Distribution of AID to Barangay, Medicine and BP Apparatus | April 21, 2023

Walang sinayang na oras ang Pamahalaang Panlalawigan ng Quezon sa pagbisita sa bayan ng San Narciso, nakipagpulong din si Gov. Doktora Helen Tan sa mga miyembro ng 4k Federation at mga pinuno ng bawat barangay upang magkaroon ng diskusyon ukol sa kanilang mga suliraning nararanasan.

Ipinaabot din ang mga tulong na lubos na magagamit upang mapanatili ang kaayusan at maiangat ang kalalagayan ng kanilang bayan patungo sa mas maunlad na pamumuhay ng bawat mamamayan.

Source: Quezon PIO