Pormal na Pagbukas ng Kauna-unahang Mini Science Centrum sa Lalawigan ng Quezon | September 12, 2023

Pormal nang binuksan ngayong araw, Setyembre 12 ang kauna-unahang Mini Science Centrum sa lalawigan ng Quezon.

Sa pagtutulungan ng Pamahalaang Panlalawigan sa pamumuno ni Governor Doktora Helen Tan, Department of Science and Technology (DOST), Lokal na pamahalaan ng Polillo, Philippine Foundation for Science and Technology (PFST) at Department of Education (DepEd), naisakatuparan na ang pagkakaroon ng Mini Science Centrum sa Polillo Central Elementary School.

Ang nasabing Science Centrum ay malaking tulong sa mga mag-aaral ng Polillo Group of Islands (Polillo, Burdeos, Panukulan, Patnanungan, Jomalig) upang mapa-unlad pa ang kaalaman ng mga kabataan sa Siyensya at Teknolohiya.

Ang isinagawang programa ay dinaluhan nina DOST Regional Director Emelita P. Bagsit, Mayor Angelique Bosque, Philippine Foundation for Science and Technology (PFST) founder and former DOST Sec. Fortunato T. Dela Peña, at DepEd CID Chief Lorena Walangsumbat.

Sa panahon ngayon na laganap na ang mga makabagong teknolohiya at paraan ng pagbibigay ng bagong kaalaman, hindi dapat napag-iiwanan ang mga nasa malalayong lugar gaya ng mga isla, dahil ang edukasyon ay isa pa rin sa matibay na pundasyon para sa tunay na pag-unlad ng mga kabataang Quezonian.

Source: Quezon PIO

61st Sangguniang Panlalawigan Regular Session | September 12, 2023

Ginanap ngayong araw ng Martes, Setyembre 12 ang ika-61 pangkaraniwang pulong ng Sangguniang Panlalawigan ng Quezon.

Dahil sa pagnanais ng Sangguniang Panlalawigan na mapabuti ang mga mamamayan, inaprubahan ngayong araw ang mga ordinansa, resolusyon at atas tagapag paganap para sa ikauunlad ng lalawigan.

Aprubado ang liham ni Governor Doktora Helen Tan na makapasok sa isang negosasyon ng Pamahalaang Panlalawigan sa CALABARZON Center for Health Development (CHD) para sa Oplan Kalusugan sa DepEd (OKD) program.

Ngayong araw din inaprubahan ng Sanggunian na gawing special non working holiday ang November 4, 2023 bilang paggunita ng taon ng kamatayan ni Apolinario Dela Cruz o Hermano Puli.

Samantala bumisita sa sesyon si Jail Chief Inspector, Warden- Female Dorm Elaine D. Toledo upang ibahagi ang paksa patungkol sa jail services, ang kanilang mga ginagawang pagpapabuti at programa para sa mga taong pinagkaitan ng kalayaan sa loob ng piitan. Isa na rito ang Aftercare Program na sinusulong ng Bureau of jail Management para sa mga person deprived of liberty.

Pinakilala rin sa nasabing session ang mga bagong talagang Provincial Government Assistant Department Head for Administration and Legislation ng Sangguniang Panlalawigan na sina Maria Gracia B. Sorezon at Atty. Sunshine Abcede-Llaga (dating Lucena City Councilor).

Source: Quezon PIO

Pagbisita ng United Private Educational Institution of Quezon Inc. (UPEIQ) sa tanggapin ni Governor Doktora Helen Tan | September 11, 2023

Ngayong araw ng Lunes, Setyembre 11, bumisita sa tanggapan ni Governor Doktora Helen Tan sa Pamahalaang Panlalawigan ang United Private Educational Institution of Quezon Inc. (UPEIQ).

Sila ay mayroong isang daan at walumpu’t dalawang miyembro (182) mula sa limang libong bilang ng mga guro sa pribadong paaralan. Sa mga kahilingan ng mga pribadong guro, sisikapin ng pamahalaan na ang mga ito ay matugunan upang maipadama na walang gurong maiiwan dahil lahat ay bibigyan ng importansya.

Sa susunod na taon (2024), magbibigay ng Masteral Scholarship Program ang Pamahalaang Panlalawigan para sa ilang mga pampubliko at pampribadong mga guro ng Lalawigan ng Quezon.

Source: Quezon PIO

Pagbisita ni Civil Defense Regional Director Carlos E, Alvares III sa tanggapan ni Governor Doktora Helen Tan | September 11, 2023

Bumisita sa tanggapan ni Governor Doktota Helen Tan si Civil Defense Regional Director Carlos E. Alvares III at ang ilang mga kasamahan nito ngayong araw ng Lunes, September 11.

Para sa kaligtasan ng mga mamamayan, napag-usapan sa pulong ang pagpapatayo ng Evacuation Centers sa ilang mga bayan sa lalawigan ng Quezon partikular na ang bayan ng Patnanungan.

Sa pagbabalikatan ng Pamahalaang Panlalawigan at ng Office of the Civil Defense tiyak ang seguridad at proteksyon ng bawat Quezonian.

Source: Quezon PIO

Pagpugay at Pag-alala ng Sangguniang Panlalawigan ng Quezon si Namayapang Dating Board Member Hermilando J. Alcala Jr. ng Ikalawang Distrito | September 11, 2023

Binigyang pugay at pag-alala ng Sangguniang Panlalawigan ng Quezon si namayapang dating Board Member Hermilando J. Alcala Jr. ng ikalawang distrito ngayong araw ng Lunes, September 11.

Si dating Board Member na mas kilala sa tawag na Ka-Eming ay nagserbisyo bilang Kabataang Barangay Chairman sa Brgy. Cotta noong 1975, naging Kabataang Barangay President sa lungsod ng Lucena noong 1978, Punong Barangay ng Cotta noong 2007- 2016, Presidente ng City Liga ng mga Barangay noong December 2013- June 2016 at naging miyembro ng Sangguniang Panlalawigan noong July 2016- June 2019.

Lubos na nakikiramay ang buong Pamahalaang Panlalawigan ng Quezon sa paglisan ni Kgg. Hermilando J. Alcala Jr.

Maraming Salamat sa katapatan at dedikasyon sa serbisyong iyong hatid para sa ating mga kalalawigan.

Source: Quezon PIO

3rd Quarterly meeting ng Provincial Development Council Via Zoom Video Conference | September 11, 2023

Ginanap ngayong araw ng Lunes, September 11 ang 3rd Quarterly meeting ng Provincial Development Council Via Zoom Video Conference.

Pinangunahan ni Governor Doktora Helen Tan ang pulong na dinaluhan ng mga miyembro ng konseho mula sa iba’t ibang tanggapan at ahensya ng gobyerno ng lalawigan ng Quezon.

Isa sa mga tinalakay sa pulong ay ang ALQUEREZ Wind Power Project. Isang proyekto ng Alternergy Tanay Wind Corporation na nagkakahalaga ng tatlong bilyong piso na ang layunin ay mabigyan ng magandang serbisyo ang mga mamamayan sa isla ng Alabat, Quezon, at Perez.

Magkakaroon naman ng pagbabahagi ang Sectoral Committee sa mga usapin ukol sa social, economic, infrastructure, environmental, disaster risk reduction at development administration ng Pamahalaang Panlalawigan sa mga susunod na araw.

Source: Quezon PIO

Turnover of Viral Load Machine | September 11, 2023

Sa pagnanais na mawakasan ang epidemya ng HIV/AIDS sa lalawigan ng Quezon, labis ang pagsisikap ng pamahalang panlalawigan sa pagbibigay ng mga solusyon at programang makatutulong sa mga indibidwal na nakararanas ng sakit na ito.

Ngayong Lunes, Setyembre 11, pinangunahan ni Governor Doktora Helen Tan ang opisyal na turnover sa Quezon Medical Center ng Cepheid GeneXpert Viral Load Machine na nagkakahalagang 1.1 million pesos.

Ang bagong kagamitan na ito ay malaking tulong upang ma-detect ang HIV/AIDS virus sa isang indibidwal, malaking bahagi rin ito upang maging accessible ang pagpapagamot nila sa nakahahawang sakit.

Labis naman ang pasasalamat ng gobernadora sa pakikipagbalikatan ng Philippine Shell Foundation Inc. (PSFI) PROTECTS upang maipagkaloob ang nasabing kagamitan at ang pagiging kaisa tungo sa pagwakas ng stigma ng HIV/AIDS sa lalawigan ng Quezon.

Source: Quezon PIO

Traffic Advisory – 11:55am September 08, 2023

Inaabisuhan ang publiko na magkakaroon ng Road Reblocking Project ang bayan ng Pagbilao para sa kalsadang nagsasalubong sa Maharlika Highway malapit sa Pagbilao-Tayabas Road at Recto St. simula sa September 12 (Martes).

Pinapayuhan ang mga motorista na gumamit ng alternatibong ruta para sa nabanggit na araw.

Source: Municipality of Pagbilao Quezon

Wildlife Assistance | September 07, 2023

Wildlife Assistance Setyembre 7, 2023 Isinangguni ng PENRO-Quezon sa Provincial Veterinary Health Center, ng Office of the Provincial Veterinarian, ang isang (1) “Oligodon sp.” na nakuha sa Balai Kayakas Resort na nasa Brgy. Ibabang Iyam, Lucena City at isang (1) “Striped Bronzeback” na mula naman sa St. Jude Village, Brgy. Mayao Crossing, Lucena City. Ayon sa pagsusuri ng ating Beterinaryo, ang mga naturang hayop ay malusog at aktibo na may magandang kondisyon ng katawan. Agad ding inirekomenda na pakawalan ang mga hayop sa natural habitat ng mga ito.

Source: ProVet

Barangay Health Workers (BHW) Convention 2023 | September 07, 2023

Isang masayang pagkakataon na magtipon-tipon ang mga Barangay Health Workers (BHW) sa ikatlo at ika-apat na distrito ng Quezon sa isinagawang BHW Convention 2023, Setyembre 7.

Pinangunahan ni Governor Doktora Helen Tan ang pagbibigay suporta sa mga BHW kasama sina Senator Imee Marcos, Cong. Atorni Mike Tan, Cong. Reynante Arrogancia, Vice Governor Third Alacala, Sangguniang Panlalawigan Members, Chairperson on Commitee on Health Board Member JJ Aquivido, Provincial Health Officer, Dr. Kristin Mae-Jean Villaseñor at mga punong bayan.

Ang pagsasagawa ng programang ito ay pagpapakita ng kahalagahan ng mga BHW sa walang sawang sakripisyo at dedikasyon nila upang patuloy na maipaabot ang serbisyong medikal sa bawat sulok ng ating lalawigan.

Sa patuloy na paghahangad ng pamahalaang panlalawigan na maiangat at maisaayos ang serbisyong pangkalusugan, inaasahan na kaisa palagi ang BHW sa malaki nilang gampanin tungo sa malusog na mamamayan ng Quezon.

Source: Quezon PIO