Visitation of President Ferdinand ‘Bongbong’ R. Marcos, Jr. – Mauban, Quezon | July 26, 2024

TINGNAN: Personal na nagtungo ngayong araw ng Biyernes, Hulyo 26 sa bayan ng Mauban si Pangulong Ferdinand “Bongbong” Marcos Jr. kasama si Governor Doktora Helen Tan gayundin ang iba’t-ibang opisyal ng nasyonal at lokal na pamahalaan upang inspeksyonin ang Sea Wall Project at Port ng nasabing bayan matapos manalasa ng Bagyong Carina at ng Hanging Habagat.
Pinangunahan din ni Pangulong Marcos ang isinagawang situation briefing sa paglalayon na matukoy ang mga naging epekto ng bagyo sa lalawigan ng Quezon, at napag-usapan naman ang mga proyektong isasakatuparan bilang tugon para sa pangangailangan ng mga naapektuhang pamilya.

---

Quezon PIO

Walang Pasok – July 25, 2024 Thursday

PABATID:

WALANG PASOK BUKAS (July 25) sa lahat ng antas ng paaralan at mga tanggapan ng pamahalaan sa lalawigan dulot ng tuloy-tuloy na pag-ulang dala ng southwest monsoon at ng Bagyong Carina.

Source: PDRRMC Memorandum Circular no. DHT-04

Memorandum Link:
https://www.facebook.com/QuezonPDRRMO/posts/pfbid07nfRggH6U6sZwr14MuPzCvUvQweCkkPgy3vcuW6fmRF7Er8cqTXx2FsCw2TBwQxvl?rdid=HNKvyugqzDRzRlBu

---

Quezon PIO

Pagbisita ni Governor Doktora Helen Tan sa QPHN – Candelaria | July 23, 2024

Tingnan: Binisita ni Governor Doktora Helen Tan ang QPHN – Candelaria ngayong araw ng Martes, ika-23 ng Hulyo.

Inisa-isa ng gobernadora ang bawat pasilidad ng nasabing ospital upang matiyak na lubos itong mapakikinabangan ng mga mamamayan mula sa Candelaria at mga karatig bayan nito.

Ayon sa gobernadora, sa oras na tuluyang matapos ang QPHN – Candelaria ay malaki ang maitutulong nito sa pagpapaluwag ng daloy ng mga pasyente na nagtutungo sa QPHN – Quezon Medical Center. Inaasahan na matatapos ang rehabilitation ng nasabing ospital bago matapos ang taong 2024.

Source: Quezon PIO

QMC Stakeholder’s Night & Employees’ Awards | July 23, 2024

“Isang Daan tungo sa 100 Taong Kagalingan.”

Bilang bahagi ng ika- isandaang taon ng pagkakatatag ng Quezon Medical Center na kilala noon bilang Quezon Memorial Hospital at Tayabas Provincial Hospital, binigyang parangal at pagkilala ang mga natatanging katuwang sa kalusugan at empleyado nito sa ginanap ang Quezon Provincial Hospital Network- Quezon Medical Center Stakeholder’s Night and Employees’ Awards ngayong araw ng Martes, Hulyo 23 sa Quezon Convention Center.

Pinangunahan ni QMC Chief of Hospital Dr. Juan Eugenio Fidel B. Villanueva ang programang nilaan para sa pagbigay karangalan sa katuwang ng institusyon pagdating sa kalusugan, edukasyon, agrikultura, pangkabuhayan, imprastraktura, turismo sa kalikasan at kapaligiran, at mabuting pamamahala na dinaluhan ni Governor Doktora Helen Tan, Atty. Aleix Alcala, Dr. Ramon V. Carmona Jr. at Dr. Kristin Mae Jean Villaseñor.

Ilan sa mga parangal na ibinigay sa mga karapat dapat na empleyado ay ang mga sumusunod:

– Office of the Year Award (Division Level)

– Promising Employee of the Year Award (Division Level)

– Employee of the Year Award (Division Level)

– QMC Outstanding of the Year

– QMC Most Promising Employee of the Year

– QMC Outstanding Employee of the Year

Source: Quezon PIO

BLOOD DONATION DRIVE: Give Blood, Give Life | July 23, 2024

TINGNAN: Para sa layuning makapagdusgsong ng buhay sa pamamagitan ng pagdo-donate ng dugo, ginanap ang isang BLOOD DONATION DRIVE: Give Blood, Give Life ngayong araw ng Martes, Hulyo 23.

Sa inisyatibo ng Pamahalaang Panlalawigan sa pamamagitan pakikipag-ugnayan ng Provincial Disaster Risk Reduction and Management Office (PDRRMO) sa Red Cross Philippines, nakapag-donate ang 52 individual blood donors na nagmula sa mga kawani ng Bureau of Jail Management and Penology (BJMP), Department of Public Works and Highways (DPWH), Radyo Pilipinas, 32nd Airforce Group Reserved at Provincial Government Office.

Samantala, patuloy naman ang pagsuporta ng pamahalaang panlalawigan sa mga ganitong uri ng aktibidad na nakatutulong upang makapagdusong ng buhay.

Awarding Ceremony of Service Vehicles | July 23, 2024

TINGNAN: Masiglang tinanggap ng ilang mga barangay ng munisipalidad ng Lucban, Sampaloc, Mauban, at lungsod ng Tayabas ang 15 Multi-Purpose Vehicle mula sa Pamahalaang Panlalawigan sa pangunguna ni Governor Helen Tan at ng Kabalikatan Foundation Inc.. Ang mga sasakyang ito ay magagamit at makakatulong sa mga residente ng barangay na higit na mapapakinabangan ng kanilang komunidad. Isinagawa ang opisyal na turnover ngayong araw ng Martes, Hulyo 23 sa Quezon Convention Center.

Source: Quezon PIO

Legal Mission for Barangay Justices | July 22, 2024

Umabot sa mahigit 200 mamamayan mula sa ikalawang distrito ng Lalawigan ng Quezon ang nakilahok sa ginanap na libreng konsultasyong legal at notaryo sa pangunguna ng Quezon Provincial Legal Office na pinamumunuan ni Acting Provincial Legal Officer Atty. Jette Salvacion ngayong Lunes, Hulyo 22.

Layon ng aktibidad na ito na mapalaki ang kapasidad ng mga mahistrado ng barangay sa buong ikalawang distrito na makatulong sa pangangasiwa ng hustisya sa kanilang nasasakupan.

Tuloy-tuloy ang pagbababa ng Pamahalaang Panlalawigan ng mga programang katulad nito na tunay na kapaki-pakinabang sa mga mamamayang katuwang ng lokal na pamahalaan sa paghahatid ng serbisyo sa kanilang pamayanan.

Source: Quezon PIO

Ika-106 Pangkaraniwang Pulong ng Sangguniang Panlalawigan ng Quezon | July 22, 2024

Sa pagpapaigting ng mas maayos at maunlad na lalawigan ng Quezon sa usaping lehislatura, ginanap ngayong Lunes, Hulyo 22 ang ika-106 na Pangkaraniwang Pulong ng Sanggunian.

Napagtibay ang ilang mga executive orders sa ginanap na pulong kabilang na ang pagbibigay ng PHP 28,810,000 tulong pinansyal para sa mga mangingisda, magsasaka, at iba pang mga mamamayan na naapektuhan ng El Niño.

Aprubado rin ang ordinansa ng bayan ng Pagbilao na nag-aatas ng curfew hours para sa mga bata o menor de edad na mula 9:00 ng gabi hanggang 4:00 ng umaga, kalakip nito ang paghuli sa mga batang lalabag sa ordinansa at kailangan sunduin ng kanilang mga magulang.

Samantala, kinilala naman ang Quezon Deaf Community Chillin Bros na nagkamit ng unang pwesto sa kauna-unahang National Men’s and Women’s 3×3 Basketball Tournament ng Deaf Association of Quezon Province (DAQP).

Asahan ang patuloy na pagsuri at pag-apruba ng Sanggunian Panlalawigan ng Quezon sa mga bagong kautusan, ordinansa, at resolusyon na magbibigay ng tulong sa patuloy na pag-unlad ng lalawigan sa mga darating na sesyon.

Source: Quezon PIO

1st Semester Meeting of the Provincial Committee on Migration & Development (PCMD) | July 19, 2024

Isinagawa ngayong araw ng Biyernes, Hulyo 19 ang 1st Semester Meeting ng Provincial Committee on Migration and Development (PCMD) na pinangunahan ng Quezon Public Employment Service Office (PESO) at Provincial Gender and Development Office (PGAD).

Iprinesenta sa ginanap na pagpupulong ang executive order na layuning mas mapalakas at maging organisado ang nasabing konseho para sa pagbibigay ng serbisyo at proteksyon sa ating mga kalalawigang nagtatrabaho sa ibang bansa.

Nagkaroon din ng talakayan ukol sa mga aktibidad at programang nais isakatuparan ng PCMD sa mga susunod na buwan.

Source: Quezon PIO

Lingap sa Mamamaya Libreng Gamutan – Polillo, Quezon | July 19, 2024

Sa layunin na masigurong nailalapit ang serbisyo ng Kapitolyo lalo na ang mga programang pangkalusugan, kahit saang sulok sa Quezon ay pilit na pinupuntahan ng Pamahalaang Panlalawigan sa pangunguna ni Governor Doktora Helen Tan katuwang si Vice Governor Third Alcala.

Ngayong araw ng Biyernes, matagumpay na naihatid sa Balesin Island ang programang “Lingap sa Mamamayan, Libreng Gamutan” at napakinabangan ng 1,291 na mamamayan ng nasabing isla ang iba’t-ibang libreng serbisyong medikal gaya ng medical check-up, bunot ng ngipin, minor surgery, tuli, eye check-up, ENT, derma, X-RAY, Ultrasound, ECG, CBC, Urinalysis, cervical cancer screening, implant insertion, at pagbabakuna ng PCV 23.

Lubos naman ang pasasalamat ng Pamahalaang Panlalawigan ng Quezon sa patuloy na pakikipagbalikatan ng mga doktor at espesyalista na nagsilbing daan upang maging possible ang ginanap na Medical Mission.

Source: Quezon PIO