Farm Productivity Enhancement Program, patuloy na ipinatutupad sa Quezon


 

2017-06-13

 

 

Sa pamamatnubay  ni Gob. David C. Suarez, pinangunahan ng Tanggapan ng Panlalawigang Agrikultor (OPA) ang isinagawang oryentasyon ukol sa Integrated Nutrient Management and Soil Sampling sa Pitogo Vegetable Growers Association (PVGA), kamakailan sa Brgy. Bilocao, Pitogo, Quezon.

 

Layunin nito na magkaroon ng karagdagang kaalaman sa wastong pamamaraan ng pagsusuri ng lupa para sa tamang rekomendasyon ng abono upang maging maganda at malusog ang mga halaman at makamit ang inaasahang ani ng mga magsasaka.

 

Ibinahagi ni G. Edilberto J. Labitigan mula sa OPA ang mga paksa ukol sa Integrated Nutrient Management at hinihikayat ang mga magsasaka na ipasuri ang kanilang lupa upang malaman ang tamang uri at dami ng abonong dapat ilagay dito, kasabay nito ay nagkaroon din ng demonstrasyon sa paraan ng pagkuha ng composite soil sample sa mga lupang sakahan.

 

“Sa mga nagnanais na magpasuri ng lupa ay makipag-ugnayan at bisitahin ang Soil Laboratory ng OPA na matatagpuan sa Brgy. Talipan, Pagbilao, Quezon.” dagdag pa ni G. Labitigan.

 

Kasabay nito, isinagawa rin ang regular na buwanang pagpupulong ng samahan sa pangunguna ni G. Vic Martinez, pangulo ng samahan ng PVGA at sa pagsubaybay ni Gng. Realeza D. Salazar – SIPAG Quezon Focal Person. (OPA Info. Unit / Quezon PIO)

 
 
 
BACK